Eksperti i ekonomisë, Dritan Shano, përmes një postimi në rrjetet sociale, shprehet se mbyllja e ekonomive si “kurë” ndaj Covid-19, është më keq se vetë virusi.
Shano shkruan se secili mund t’i bëjë vetë llogaritë duke futur dorën në xhep dhe duke parë në televizor baballarët e gjetur.
Në këtë kuadër duket se Shano ka ironizuar Kryeministrin Edi Rama, i cili pak ditë më parë e quajti veten si babai i shqiptarëve.
Postimi nga Dritan Shano
Situata e krijuar nga koronovirusi është në fakt situatë e krijuar nga qeveritë, me arsyetimin gjakftohtë se mbyllja e ekonomive e sjell vdekjen e njerëzve më ngadalë se Covid-19. A është e vërtetë kjo? Askush nuk mund ta thotë me siguri.
Ajo që është e vërtetë, sipas OBSH, është se në 100 njerëz të prekur nga virusi, rreth 80 prej tyre imunizohen në këmbë, 15 kanë nevojë për trajtime të ndryshme mjekësore, dhe vetëm 5 për terapi intensive. Ata që humbin jetën janë kryesisht tek ky grupi i fundit i 5 njerëzve.
Nga ana tjetër, prej mbylljes së ekonomisë nga qeveritë në 100 njerëz të prekur, të 100-ve u nxihet jeta, dhe të 100-ë mbeten pa punë, pa para, pa ushqim.
Por hesapet, tani pas tre javësh a më shumë, secili prej jush mund t’i bëjë vetë. Duke futur dorën në xhep dhe duke parë televizor baballarët e gjetur. Personalisht, mendoj se mbyllja e ekonomisë si “kurë ndaj Covid-19, është më keq se virusi vetë”.
