Kreu i Partisë Demokratike, Lulzim Basha, nëpërmjet një statusi në Facebook shprehet se qeveria duhet të bëjë transparente kapacitetet laboratorike si dhe të shtojë numrin e testimeve për qytetarët.
“Çdo vonesë jo vetëm fsheh të vërtetën por do të na kushtojë shumë shtrenjtë! Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit.”-shprehet Basha.
Statusi i plotë i Bashës:
Transparenca dhe informacioni mbi gjendjen reale të infektimeve janë jetike për të ofruar garanci dhe siguri për stafet mjekësore dhe për të gjithë qytetarët.
Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit.
Prandaj sa nuk është vonë i bëj thirrje qeverisë të shtojë urgjentisht numrin e testimeve dhe të bëjë publike gjithë kapacitetet tona laboratorike.
Çdo vonesë jo vetëm fsheh të vërtetën por do të na kushtojë shumë shtrenjtë!
Sa më pak testime, aq më pak persona të identifikuar, aq më shumë të infektuar, aq më gjatë do të vazhdojë karantina dhe më shumë do të thellohet kriza ekonomike.
Koha për të vepruar është TANI! Çdo ditë e humbur kushton jetë!
