Ministri e Shëndetësisë njoftoi këtë të Premte 27 raste të reja me COVID-19 (304 total), shifra e dytë më e lartë (pas 26 Marsit me 28 raste të reja) që kur në vend u konfirmuan të prekurit e parë. Ndërkohë, janë ngritur dyshime se shifrat reale fshihen nga qeveria.
Ministria njoftoi sot se numri i të infektuarve që po marrin shërbim në dy spitale COVID ishte 81, por me një nonsens në shifra: 73 tek Infektivi në QSUT dhe 4 tek Shefqet Ndroqi (total 77). Të njëjtat shifra u njoftuan dhe në deklaratën për media, nga zv-ministrja e Shëndetësisë Mira Rakacolli.
Në një njoftim të dytë, Ministria e ndryshoi shifrën totale në 77.
Akuzat ndërkaq, se institucionet po fshehin numrin real të personave të prekur, pacientëve të shtruar në spital dhe atyre që kanë humbur jetën, nuk kanë munguar. Ish-kryeministri Sali Berisha deklaroi një ditë më parë në një emision televiziv se numri i të vdekurve dhe të infektuarve përcaktohet politikisht.
“Në Shqipëri ndodh ajo që vetëm në Korenë e Veriut mund të ndodhë. Këtu shifrat që jepen për të sëmurët me COVID-19, për të vdekurit nga viroza me COVID-19, për të infektuarit, përcaktohen politikisht në mënyrë të paimagjinueshme nga një njeri që është një xhahil total dhe që ka centralizuar në duart e tij çdo të dhënë çdo shifër çdo veprim. Të thuash që ke 277 të prekur këtë se beson njeri, sepse kanë bërë shumë pak teste krahasuar me vendet e tjera”, tha Berisha.
