Avokati i njohur Ledio Braho tha mbrëmjen e sotme se masat e marra nga Qeveria lidhur me qarkullimin dhe daljen e qytetarëve nga banesat kanë një problem ligjor, pasi në aktet normative nuk thuhet diçka e tillë. Braho shprehet se kufizimet e lëvizjeve nga qytetarët po zbatohen nga vetë qytetarët pasi nuk ka asnjë akt normativ për kufizimin e lëvizjes së tyre, por ka vetëm akt normativ për ndëshkimet për ata që shkelin kufizimet.
“Ka një problem ligjor me këto masa, që ta të bëjë me faktin se që nga data 23 mars, sipas akteve të publikuara nuk rezulton që të ketë kufizim për liridaljen e qytetarëve në këmbë. Kufizimet kanë të bëjmë me mbarëvajtjen e subjekteve tregtare si dhe për lëvizjet me automjet. Ndërsa për lëvizjen e qytetarëve, që më 21 mars, nuk ka asnjë masë ligjore.
Të gjitha masat dhe kufizimet respektohen nga qytetarët pa një bazë ligjore. E njëjta gjë vlen dhe për aplikimet që bëhen në e-Albania. Nuk ka asnjë bazë ligjore. Aktet normative kanë të bëjmë vetëm me masat që merren kur shkelen këto kufizime”, deklaroi avokati Braho për Euronews Albania.
Lidhur me shpalljen e jashtëzakonshme për fatkeqësinë natyrore, Braho tha se vetëm dje është njoftuar Këshilli i Europës për kufizimet e disa të drejtave të njeriut, por ajo që se ka njoftuar është cënimi i të drejtave tënjeriut lidhur me hyrjen në territorin e shtetit shqiptar të shtetasve shqiptarë që kanë mbetur jashtë vendit.
Sipas Brahos, kjo është shkelje e Kushtetutës dhe konventës ndërkombëtare të të drejtave të njeriut. Braho tha se kufinjtë janë mbyllur për shtetasit e huaj, por jo për shtetasit shqiptarë.
“Po u kufizohet liria pa një akt ligjor në fuqi. Gjithashtu po u kufizohet liria qytetarëve shqiptarë që ndodhen jashtë vendit. Ka detyrim për ata që janë rezidentë në Shqipëri, të kenë të drejtë të kthehen në vendin e tyre”, tha ai.
Ndërkohë, avokati Adriatik Lapaj, gjithashtu thotë se, vendimet e publikuara nga Kryeministri në rrjetet sociale nuk janë të përkthyera në akte ligjore dhe nënligjore që duhen botuar në Fletoren Zyrtare.
Sipas tij, akti normativ për të liruar një pjesë të të burgosurve është një akt që vjen në kundërshtim me Gjykatën Kushtetuese.
“Në asnjë rast një akt normativ nuk mund t’i mbivendoset një legjislacioni që është miratuar me shumicë më të madhe. Mënyra e vuajtjes së dënimit përcaktohet nga Kodi Penal”, u shpreh ai.
