Pezullimet e kompeticioneve futbollistike në të gjithë botën, për shkak të pandemisë së coronavirusit, ka pasur dhe do të ketë implikime të mëdha financiare për klubet, lojtarët dhe trajnerët.
UEFA tashmë ka shtyrë Euro 2020 deri në vitin 2021, ndërsa nuk ka një datë të caktuar për finalen e Champions League apo Europa League.
“Asgjë nuk do të kthehet të jetë si më parë në futboll”, ka thënë presidenti i UEFA-s Aleksandër Ceferin.
Në qoftë se sezoni aktual nuk do të përfundonte atëherë klubet dhe ligat do të pësonin humbje masive.
Për shkak të mungesës së të ardhurave nga të drejtat e TV dhe marrëveshjet e sponsorizimit, në Spanjë pritet që të humben rreth 700 milion euro, ndërsa në të gjithë Evropën shifra pritet të jetë rreth shtatë miliardë euro.
Mundësia e anulimit të pjesës tjetër të sezonit po bëhet realitet në Itali, Hollandë dhe tani Spanjë.
Në tregun e transferimeve, paratë nuk do të jenë aq të disponueshme për të shpenzuar sa vitet e fundit, që do të thotë se vlerat e lojtarëve do të bie.
Sipas Observatorit të Futbollit CIES, Paul Pogba , kontrata e të cilit skadon në 2021, tani do të vlerësohet me rreth 35 milion euro. Ndërsa sipas të njëjtit raport, Real Madrid, e cila e bleu Edin Hazard për 100 milionë euro verën e kaluar, tashmë mund ta bënte këtë transferim për “vetëm” 65 milionë euro.
Shtyrja e Euro 2020 ka hapur mundësinë për kampionatet europiane që të përfundojnë sezonet e tyre gjatë verës, por, edhe me këtë kohë në dispozicion, duke parë situatën aktuale, gjasat që futbolli i luajtur të rikthehet janë të pakta.
Organet drejtuese të futbollit botëror po punojnë për të gjetur një zgjidhje për të gjitha këto probleme dhe vetëm koha do të tregojë se sa i madh është ndikimi i COVID-19 në futboll.
