Debati se kush është më i mirë midis Cristiano Ronaldos dhe Lionel Messit, ka vazhduar prej më shumë se një dekade dhe arritjet e tyre do të krahasohen gjithmonë, edhe në kohën pasi të dy do të jenë tërhequr nga sporti.
Të dy lojtarët kanë realizuar gjëra të jashtëzakonshme gjatë karrierës së tyre dhe të dy kanë argumentet e tyre për lojtarin më të mirë të të gjitha kohërave.
Në verën e vitit 2018, lajmet se Ronaldo po kërkonte një largim nga Real Madrid filluan të qarkullonin. Ato raportime dolën të jenë të vërteta kur ai u transferua te Juventusi.
Por pse u largua Ronaldo nga Real Madrid? Në lidhje me këtë, Jamie Carragher ka dhënë teorinë e tij interesante në një intervistë për “CaughtOffside”. Ish-lojtari i Liverpoolit mendon se Ronaldo vendosi të largohej me dëshirën e tij që të konsiderohej një lojtar më i mirë se Messi.
“Unë mendoj se Ronaldo e kupton se ai është parë inferior ndaj Messit, kështu që them se ai është treguar mjaft i zgjuar duke kaluar në Itali”. – tha ai fillimisht.
“Tani ai ka arritur të jetë i suksesshëm në katër klube në katër vende të ndryshme. Messi, nga ana tjetër, ka qenë në Spanjë gjithë karrierën e tij dhe nuk ka guxuar të provojë veten jashtë Barcelonës. Ky mund të jetë një nga argumentet për karrierën e tij”.
Në fund gjithsesi, Carrager, thekson se Messi nuk ka nevojë ta provojë veten në asnjë kampionat tjetër, pasi ajo çfarë ka bërë te Barcelona është thjesht e mrekullueshme.
