Presidenti i Republikës së Kosovës, Hashim Thaçi reagoi edhe njëherë për situatën e krijuar politike pas rrëzimit në Kuvend të qeverisë së Albin Kurtit.
Në një deklaratë për shtyp, Thaçi deklaroi se nga e hëna do të nisin konsultimet me liderët e partive politike për themelimin e qeverisë së re. Sipas tij, mund të mos ketë zgjedhje të reja dhe shpërbërje të parlamentit, por një qeveri stabiliteti.
“Në fokus mund të mos jetë zgjedhjet e reja dhe shpërbërja e Kuvendit, por mundësia e krijimit të qeverisë së re. Fokusi im është që të shkojmë drejt një qeverie të stabiliteti, unitetit dhe gjithëpërfshirës në mënyrë që të ketë sukses në reformat tona të nevojshme”, deklaroi Hashim Thaçi.
Me 82 vota pro, 32 kundër dhe 1 abstenim, Kuvendi i Kosovës e ka miratuar të mërkuren mocionin e mosbesimit ndaj Qeverisë, duke e rrëzuar atë. Votimit në Kuvend i ka paraprirë një debat maratonik.
Beteja politike në Kosovë, që kulmoi me mocionin e mosbesimit, nisi para më shumë se një jave, kur presidenti Hashim Thaçi firmosi dekretin për gjendje të jashtëzakonshme, gjë për të cilën Qeveria nuk u pajtua. Një ditë më vonë, Agim Veliu i LDK-së do të shkarkohej nga pozita e ministrit të Brendshëm, gjë të cilës LDK-ja do t’i përgjigjej me inicim të mocionit të mosbesimit ndaj Qeverisë, pjesë e të cilës ishte.
