Jo vetëm Kryeministri Edi Rama, por edhe ministri i Brendshëm, Sandër Lleshaj, ka paralajmëruar qytetarët se do përballen me masa ndëshkimore të ashpra nëse shkelin ndalim-qarkullimin, e vendosur në kuadër të masave kundër koronavirusit.
“Rreth 1200 qytetarë janë ndëshkuar me masë administrative 10 mijë lekë, pasi janë konstatuar nga shërbimet policore apo njoftuar përmes telefonatave në 112 ose Komisariatin Dixhital, duke lëvizur me këmbë apo biçikletë pa arsye a emergjencë.
E vetmja mënyrë për të shpëtuar veten e familjarët tuaj është të qëndroni në shtëpi. Nuk ka zgjidhje tjetër. Në të kundërt, masat policore për ndëshkimin e shkelësve, do të jenë më të ashpra e të forta. Askush nuk do të tolerohet”, paralajmëron Lleshaj në rrjet.
Referuar Akteve Normative, qarkullimi lejohet prej orës 05:00 deri në orën 13:00, me përjashtim të rasteve kur qytetarët janë pajisur me leje të posaçme.
