Ish-deputetja demokrate Albana Vokshi ka reaguar ndaj testimeve që po kryhen për Covid 19, duke theksuar se po testohen pak të dyshuar dhe nuk respektohet kërkesa e OBSH.
“Organizata Botërore e Shëndetësise (OBSH) përsëriti thirrjen që Qeveritë të testojnë sa më shumë persona të dyshuar.
OBSH thotë se kjo është mënyra e vetme për të ulur trendin e frikshëm të përhapjes së virusit COVID 19 në vende të ndryshme të botës.
Fatkeqësisht, qeveria shqiptare nuk po i zbaton kërkesat e OBSH”, shkruan Vokshi në rrjetet sociale.
Në vijim, referuar shifrave të publikuara nga Ministria e Shëndetësisë mbi numrin e testimeve dhe rasteve të konfirmuara, Vokshi shprehet se javën e fundit rastet e të prekurve janë rritur ndjeshëm, por jo numri i testeve.
“E enjte: 32 teste, 5 raste
E premte: 35 teste, 6 raste
E shtunë: 46 teste, 6 raste
E diel: 33 teste, 13 raste
E hënë: 45 teste, 15 raste
E martë: 74 teste, 19 raste
E mërkurë: 111 teste, 23 raste
Edi Rama po ndjek një taktikë të gabuar, duke kontribuar në përhapjen e virusit në një numër më të lartë qytetesh të vendit. Duke mos i testuar, duke mos i gjurmuar rastet e dyshuara, trajtimi dhe izolimi i virusit është bërë më i vështirë.
Pjesa më e madhe e personave të infektuar kanë shkuar në spital në gjendje kritike shëndetësore dhe në rrezik për jetën”, shkruan ajo.
Në vijim, Vokshi ngre shqetësimin e infektimit të stafeve mjekësore, duke shtuar se kjo e bën situatën alarmante.
“Ajo që e bën edhe më alarmuese situatën është shtimi i rasteve të personelit mjekësor dhe stafit mbështetës spitalor. Kjo rikthen vëmendjen tek shqetësimi ynë kryesor se personeli shëndetësor është shumë i pambrojtur përballë virusit tinzar dhe agresiv.
Në kushtet e rëndimit të situatës, ka ende #një mundësi për të ngadalësuar përhapjen e virusit e për të shpëtuar sa më shumë jetë: Qeveria të zbatojë në mënyrë rigoroze kërkesat e OBSH”, shkruan Vokshi.
