Guvernatori i Bankës së Shqipërisë, Gent Sejko, njoftoi sot uljen e normës bazë të interesit në 0.5% nga 1 për qind që ishte më parë.
Kjo ishte masa e njoftuar nga Këshilli Mbikqyrës i BSH-së, ndërkohë që vendi është përfshirë nga pandemia botërore e koronavirusit.
Sejko e cilësoi këtë pandemi si një sfidë për ekonominë dhe sektorin financiar.
Ulja e normës së interesit, ul koston e huasë dhe interesat e borxhit publik, si dhe ndihmon në lehtësimin në presionet në bilancet financiare të operatorëve ekonomike.
Sejko tha se ky vendim plotëson masat që kemi marrë më parë për lehtësimin e efekteve të pandemisë.
“Synojmë funksionimin normal të sektorit e pagesave dhe likuiditetit. Banka po aplikon strategjinë e pakufizuar me likuiditete të pakufizuara për operatorët ekonomikë.
Masat që kemi marrë mundësojnë dhe plotësojnë paketën fiskale të miratuar nga qeveria shqiptare që mënjanojnë përçimin e krizës nga sektori privat në atë publik”, tha Sejko.
Në vijim, ai njoftoi se Banka e Shqipërisë do të përdorë të gjithë hapësirat monetare për të minimizuar efektet e pandemisë në ekonominë dhe lehtësimin e kostos së krizës në ekonomi dhe familjet shqiptarët.
“Do te kemi një stabilitet të çmimeve në periudhë afatgjatë dhe afatmesme. Mesazhet që kemi dhënë për shëndetin e ekonomik dhe financiar janë të vlefshme edhe tani. Bankat dhe ekonomia janë të shëndetshme, me likuiditete të bollshme”, u shpreh Sejko.
