Aktiviteti tregtar në portet e vendit e sidomos në atë të Durrësit ka vijuar normalisht edhe këto ditë të emergjencës globale, që ka krijuar pandemia Covid 19.
Drejtori i Përgjithshëm i Drejtorisë Detare, Paulin Ndreu, tha se çdo ditë po vijnë tragete me kamione e mallra në Porte. Ai garantoi se askush nuk duhet të ketë frike për furnizime të mjaftueshme ushqimore.
Ndreu tha se, një anije në fund të javës u shkarkua me 5 mije ton grurë, ndërkohë një anije tjetër po shkarkon aktualisht edhe 8 mijë tonë të tjera. Edhe dy anije të tjera po ngarkohen me grurë jashtë porteve të Durrësit dhe pritet të zbarkojnë këto ditë, tha Ndreu.
Ai tha se me të njëjtin normalitet vijon edhe furnizimi me mallra të tjerë sidomos ushqime. Sipas tij, çdo ditë vijnë nga 40-50 kamionë me ushqime nga portet e Barit dhe Ankonës.
Ndreu tha se nuk duhet te ketë shqetësime rreth ushqimeve pasi furnizimet kanë vijuar normal çdo ditë.
Gjithashtu furnizimet nga brenda vendit kanë qenë normale. Kamionë me prodhime të stinës nga zonat prodhuese të vendit si Korça dhe Lushnja, Fieri etj kanë vijuar normalisht.
Aktualisht fermerët po shesin nga prodhimet e stinës të tilla si sallatë, spinaq, qepë dhe hudhër e njomë etj.
Fermerët nga fshati Verri në zonën e Fierit pohuan se shumë shpejt del kungulli dhe trangulli i ri. Ato lajmërojnë se mbjelljet kanë vijuar normalisht.
Në të gjithë botën aktivitet e bizneseve janë kufizuar, por aktivitetet që kanë të bëjnë me prodhimin dhe tregtimin e produkteve ushqimore nuk do të ndalojnë askund në botë.
Epidemiologët kanë pohuar se, zonat rurale nuk janë shumë të kërcënuara nga epidemia. Bujqësia shqiptare është edhe më pak e kërcënuar për shkak se prodhimi është i organizuar me ferma të vogla familjare. /Monitor/
