Nga zyra e tij në Kryeministri, Edi Rama, i ka drejtuar një apel qytetarëve për të respektuar rregullat e distancimit social, vetëkarantinimit në shtëpi, larjen e duarve sa më shpesh, duke theksuar se duhet të shmanget katastrofa.
Në mesazhin e tij, Rama u shpreh se nuk e ndalim vdekjen të na marrë njerëz, por të shmangim kërdinë për shkak të papërgjegjshmërisë.
“Siç e patë, fatkeqësisht humbi jetën dhe një 42 veçar që nuk vuante nga sëmundje kronike, ngushëllime familjeve të të ndjerëve.
E dimë se virusi synon më të moshuarit dhe më të dobëtit, por as të rinjtë nuk janë 100% të paprekshëm.
Por ju lutem si të gjithë herët, të gjithëve, mos luani me zjarrin, nuk e ndalim vdekjen të na marrë njerëz por të shmangim kërdinë për shkak të papërgjegjshmërisë, do të humbasim njerëz, askush nuk e di se sa, po jo të humbasim një mal me njerëz, kurrën e kurrës, këtë e kemi ne në dorë”, tha ai.
Deklarimet dhe tonet e përdorura nga Edi Rama sot dhe paralajmërimet e kobshme për kërdi apo katastrofa, mund të ishin shmangur duke karantinuar të gjithë ata që hynë në territorin shqiptar, pasi në Itali shpërtheu koronavirusi. Askush nuk e ndalonte Kryeministrin që të shpallte Aktet Normative në fillim të marsit, për t´i detyruar ata që vinin nga zonat e kuqe që të karantinoheshin me detyrim, ndoshta edhe larg familjeve të tyre.
Sot në mbi 85 % të rasteve, ata që janë identifikuar si të prekur me Covid 19, janë infektuar nga të afërmit apo të njohurit që transportuan virusin drejt Shqipërisë si mbartës të tij.
Së fundmi kjo është provuar në Vlorë, ku personat e një familjeje u infektuan nga një i afërm që i erdhi nga Italia, sikundër ka ndodhur edhe në Korçë, Fier apo edhe në Tiranë.
Në mesazhin e tij, Kryeministri i është përgjigjur edhe kritikëve, që i kanë bërë thirrje Kreut të Qeverisë, të dali nga banesa në Surrel dhe të marrë përgjegjësitë që i takojnë.
“Ta qepin gojën ata që thonë dil nga shtëpia. Unë në shtëpi mbyllem në fundjavë, si gjithë të tjerët, se nuk i përkas rracës së keqe që thonë ‘bëni si them unë, po mos bëni si bëj unë’.
Realisht është kulmi, që në këtë kohë kolere shpifjet dhe brockullat vazhdojnë. Nuk jam tipi i dukjeve se nuk më ka munguar dukja, pikë e zezë. Kjo javë do të jetë intensive, se hyjmë në javën e shpërthimit të bombava”, tha Rama.
Reagimi i Kryeministrit ka ardhur pasi në Shqipëri në 24 orët e fundit janë identifikuar 15 raste të reja me Covid 19, ndërkohë që numri total është 104.
Gjithashtu ka pasur një rritje të numrit të jetëve të humbura, ku aktualisht numërohen 4 viktima, ndërsa numri i të shëruarve është 5.
