Qëndroni në shtëpi dhe kini besim te mjekët. Është ky apeli që shefja e shërbimit në Spitalin Infektiv, Najada Çomo, u ka drejtuar qytetarëve, në një kohë kur janë identifikuar 70 raste të infektuara me Covid 19.
Çomo tha se në këtë pavion tashmë po përballen me shtim të të infektuarve, tre prej të cilëve janë në terapi intensive.
Videon me mesazhin e mjekes e ka postuar kryeministri Edi Rama i cili shkruan: “Najada, shefja e forcës speciale në vijën e zjarrit, ku luftohet orë e minutë për të shpëtuar pengjet e armikut, ka një mesazh dhe një lutje për Ju: MOS DILNI NGA SHTËPIA🙏#RESPEKT”
Mesazhi i mjekes Najada Çomo:
“Ju përshëndes nga shërbimi Infektiv. dua tu jap një informacion të shkurtër. Lufta është hapur, kemi shtim të numrit të pacientëve në shërbimin infektiv, gjendja e një pjese të tyre janë në gjendje të mesme, ndërsa tre prej tyre në repart terapie intensive që janë duke marrë ndihmën e duhur mjekësore.
Ajo që dua të siguroj qytetarët e Shqipërisë është që ne jemi staf i mirëtrajnuar, me mjekë ,infermiere, sanitare, laborantë e shumë të tjerë që janë në skalionin e parë të betejës.
Ju keni besim tek ne dhe ne do bëjmë punën tonë në maksimum.
Kërkojmë mirëkuptimin tuaj për qëndrimin tuaj në shtëpi pasi kjo është një fitore e madhe për ne se ulni rrezikun e infeksionit te personat e tjerë.
S’është sakrificë e madhe të qëndrosh në shtëpi, sakrificë e madhe është të përballesh me sëmundjen, uroj e besoj që bashkëqytetarët do na mirëkuptojnë duke na mirëbesuar e duke mos frekuentuar ambiente publike, familjarë të sëmurë apo të shmangin qëndrimet që rrezikojnë për të infektuar personat e tjerë“.
