Nga Boldnews.al
Kryeministri Edi Rama deklaroi se biznesi i madh do të përjashtohet nga ndihma në atë që ai e konsideroi si “plani ekonomik” i luftës me korona-virusin, duke rënduar ndjeshëm pozitën e mijëra qytetarëve të punësuar në sipërmarrjet e mëdha.
Rama, duke iu referuar biznesmenëve të mëdhenj, deklaroi se duhet të “hanë nga dhjami i tyre” në të mirë të shoqërisë. Por, të trembur nga pasiguria e ofruar prej kryeministrit, biznesi i madh ka zgjedhur që të marrë pozita mbrojtëse, duke rënduar mbi financat e të punësuarve të tyre.
Në adresën e “Boldnews.al” kanë mbërritur një sërë sinjalizimesh, të cilat informojnë se kompani të mëdha që operojnë në Shqipëri kanë nisur hartimin e listave të punonjësve që do të pezullohen për një kohë të pacaktuar.
Në bazë të informacioneve të mbërritura në redaksi, kompani të ndryshme të mëdha kanë njoftuar të punësuarit e tyre se do të nisin menjëherë pezullimet pa afat, periudhë gjatë të cilës ata që do të qëndrojnë në shtëpi nuk do të paguhen.
Kjo është një goditje shumë e rëndë për mijëra familje, të cilat kanë si burim të tyre punësimin në sektorin privat.
Pas goditjes që morën të vetëpunësuarit dhe të punësuarit në biznesin e vogël për shkak të “karantinës” në nivel kombëtar, tashmë pasojat e rënda ekonomike pritet të jenë të menjëhershme tek të punësuarit në biznesin e madh.
Në një fjalim plot pathos ku prezantoi “planin ekonomik A të luftës”, kryeministri Rama iu drejtua biznesit të madh, jo si një aleat, por në rolin e protektorit, ku i kërkoi me ton urdhërues, që të jepnin kontributin e tyre.
Madje, Rama deklaroi se, në rast se “plani A” nuk do të mjaftonte, qeveria do të niste aplikimin e “planit B”, i cili konsistonte në marrjen “e dhjamit” nga kompanitë e mëdha.
“Plani ekonomik” i prezantuar nga Edi Rama nuk mori parasysh pjesën më të madhe të sugjerimeve të propozuara nga Konfindustria, vetëm pak ditë më parë.
Konfindustria, në një dokument zyrtar, i propozoi qeverisë marrjen e disa masave të mënjehershme, të cilat do të siguronin vazhdimësinë e punës së biznesit të madh, ruajtjen e likuiditeteve dhe, për atë që është më e rëndësishmja, pagesën e të punësuarve që janë “karantinuar”.
Në një dokument 6-pikësh, Konfindustria kërkoi, ndër të tjera që qeveria të pezullonte taksat, për aq sa do të vijonte gjendja e emergjencës së pandemisë.
Po ashtu, u kërkua që qeveria të vendosë se punonjësit e karantinuar të paguheshin nga fondi i Sigurimeve Shoqërore, në një model të ngjashëm me atë që aplikohet kur janë me raport mjekësor.
Në vijim, Konfindustria kërkonte nga qeveria që të shmangeshin bllokimet e llogarive bankare të kompanive të mëdha në rastet e detyrimeve të pashlyera tatimore, si edhe të shmangej ndërprerja e energjisë elektrike dhe e ujit, për shkak të mos-pagesës në kohë.
Nga sugjerimet e Konfindustria-s, Edi Rama vendosi të pranonte diçka fare minimale, të cilat jo vetëm nuk përmirësojnë situatën, por e rëndojnë më tej, sidomos për të punësuarit e biznesit të madh.
Qeveria pranoi vetëm propozimin për të shtyrë deri në qershor dorëzimin e bilanceve financiare të vitit 2019.
Ndërkohë që refuzoi pikat e tjera, përfshirë edhe gjetjen e një mekanizmi për pagesën e punëtorëve që janë të detyruar të qëndrojnë në shtëpi.
