Për shkak të situatës së krijuar nga pandemia botërore e koronavirusit, shumë prej vendeve kanë mbyllur kufinjtë. Kjo ka bërë që shumë qytetarë, përfshi edhe Shqipërinë të mbeten në vende të BE apo zonës Schengen, përtej afateve 3 mujore të qëndrimit të përcaktuar nga rregullat e lëvizjes së lirë.
Ndërkohë një lajm i mirë vjen nga Ministria e Punëve të Jashtme dhe Europës për shqiptarët që janë në Zvicër pasi ata nuk do të pënalizohen në rast se kalon koha e rregullt e qendrimit të tyre në këtë shtet.
Të njëjtën gjë ka konfirmuar edhe Italia, ndërkohë që vijojnë negociata me shtete të tjera.
Ja njoftimi:
Ministria për Evropën dhe Punët e Jashtme informon të gjithë shtetasit shqiptarë që tejkalojnë qëndrimin e lejuar në Zvicër për shkak të situatës COVID-19 nuk do të penalizohen.
Sipas autoriteteve zviceriane, derisa situata të kthehet në një gjendje normale, qytetarët që nuk mund të largohen nga Zona e Shengenit ose Zvicra për shkak të situatës së krijuar nga COVID-19, para skadimit të vizave të tyre ose lejeve të qëndrimit, ose skadimit të një qëndrimi 90-ditor dhe pa mënyra të tjera kthimi, lejohen të qëndrojnë në zonën Shengen.
Ministria për Evropën dhe Punët e Jashtme në bashkëpunim dhe me autoritetet zviceriane, rekomandon të gjithë shtetasit shqiptar që janë në këto kushte t’i raportojnë pranë zyrave të migrimit kantonal në Kantonin ku po qëndrojnë.
Ministria për Evropën dhe Punët e Jashtme
Drejtoria e Diplomacisë Ekonomike, Publike dhe Diasporës
