Ndërsa sot dhe nesër pritej që Komisioni i Venecias të miratonte Opinionin final lidhur me “Emërimin e Anëtarëve të Gjykatës Kushtetuese” në Shqipëri, 62 anëtarët e këtij Komisioni janë njoftuar dje se draft-opinioni nuk do të shqyrtohet dhe as miratohet në këtë fundjavë.
Mësohet se në Strasburg, Komisioni i Venecias ka patur një sërë komunikimesh qoftë me Zyrën e Presidentit të Republikës, qoftë edhe me Kuvendin e Shqipërisë, prej të cilëve ka marrë dokumentacion shtesë, të shoqëruar me komente për opinionin paraprak të nisur në Tiranë më 6 Mars 2020.
Një burim në Strasburg i tha Eunews se shtyrja e shqyrtimit dhe e miratimit në këtë fundjavë nuk lidhet me situatën e krijuar nga pandemia e shkaktuar nga Covid-19. I njëjti burim i tha se 62 anëtarët e Komisionit janë informuar dje nga Sekretariati se “projekt-Opinioni në të vërtetë përmban shumë çështje të diskutueshme dhe të vështira. Do të ishte problematik të adoptohet një tekst i tillë tani në një procedurë të shkruar”.
Raporterët kanë kërkuar shtyrjen e shqyrtimit dhe të miratimit të Opinionit në Sesionin Plenar të Qershorit në Venecia. Komisioni Europian për Demokraci përmes Ligjit njihet si Komisioni i Venecias pikërisht për shkak se i zhvillon mbledhjet plenare në qytetin italian.
Sesioni i marsit 2020 i Komisionit është në fakt i afektuar nga pandemia e koronavirusit dhe për këtë shkak shqyrtimi dhe miratimi i opinioneve do të zhvillohet në një procedurë të shkruar dhe jo në një mbledhje plenare në Venecia. Sesioni Plenar i radhës do të mbahet në qershor. Deri atëherë çështja shumë e debatuar mes Presidentit dhe Kuvendit të Shqipërisë do duhet të presë opinionin e ekspertëve të Komisionit të Venecias./ Eunews.al
