Kryedemokrati Lulzim Basha shprehet pro masave shtrënguese të qeverisë në situatën ku ndodhet vendi nga koronavirusi por i cilëson të pamjaftueshme masat mbështetëse ose planin ekonomik të prezantuar dje nga kryeministri Edi Rama.
Sa i përket kufizimeve, Basha tha në “Zonë e hapur” se e keqja nuk ka kaluar dhe se qytetarët duhet të zbatojnë në mënyrë rigoroze rregullat e distancimit social.
“Nuk duhet të kemi asnjë dilemë. E keqja nuk ka kaluar. E keqja mund të ndalet nëse japim kontributin tonë. Duhet të zbatojmë në mënyrë rigoroze rregullat e distancimit social.
Ne kemi kërkuar që këto masa të merreshin më herët. Është momenti për t’i zbatuar këto masa”, tha Basha.
Sa i përket planit ekonomik, kreu i PD deklaroi se nuk ka transparencë.
“Masat shtrënguese kanë nevojë për masa mbështetëse. Nuk mund t’i thuash gjithkujt rri në shtëpi dhe mos t’i japësh minimumin jetik. Plotësisht dakord me masat shtrënguese, kemi inkurajuar qytetarët për të ndjekur regjimin e OBSH por sakrifica e qytetarëve duhet të gjëjë mbështetjen e shtetit dhe buxhetit.
Kam bërë thirrje prej fillimit që të mos e fusim këtë çështje në suazën e një debati politik.
Absolutisht nuk jam dakord. Masat që u thanë dje që prisja t’i shikoja sot në një akt qeveritar nuk është mënyra për t’u përballur. Nuk mund të thuash e di unë, do iu them unë. Ftesa ime është transparencë maksimale dhe për planin e shpallur dje duhet transparencë maksimale. Nuk është i detajuar”, tha kreu i PD.
Basha theksoi se plani i opozitës është i detajuar për çdo zë.,
“I kemi bërë në detaje. E kemi totalin. Për një nr biznesi të vogël, kostoja nuk kalon 25 mln euro në muaj në mbështetje të tyre. Kjo duke marrë 300 euro për biznes”, u shpreh ai.
Basha iu bëri thirrje bizneseve të tilla si Call Center që të mbyllen pasi është i pamundur distancomi social. Ai tha se qeveria duhet të shpallë emergjencën kombëtare.
“Përsëris thirrjen për bizneset si call center është e pamundur të ruajnë distancimin social, të mbyllen. Mbyllja e tyre është masë shtrënguese e domosdoshme. Duhet urgjentisht shpallja e emergjencës kombëtare. Në një gjendje të tillë shteti ka detyrimet e veta ndaj qytetarëve. Mjekët nuk kanë veshje mbrojtëse, nuk kanë pajisje testuese”, deklaroi Basha.
