Kryeministri Edi Rama deklaroi sot se “do të ndalojmë menjëherë frekuentimin në parkun e liqenit artificial në Tiranë dhe në çdo park rekreativ në çdo qytet brenda perimetrit të ri të blinduar”.
Në një videomesazh nga ambientet e shtëpisë, kryeministri foli mbi masat elementare që duhet të marrë çdo individ. “Duhet t’i mbajmë dritaret hapur gjatë gjithë ditës për ajrosjen e shtëpisë dhe të fikim ajrin e kondicionuar. Por kjo nuk do të thotë të dalin xhiro familjarisht nga liqeni ku vërtetë nuk kishim shumë njerëz, por mjaftueshëm për të cenuar rregullat e mbrojtjes individuale apo buzë liqenit të Shkodrës, ku mbrëmë ishte si kohë pushimesh”, tha Rama.
Rama tha se “jemi në kohë lufte dhe nuk kemi kohë të vijojmë me sensibilizime sepse çdo orë është kritike”.
“Sot kishim 38 persona të infektuar, 12 në spital, dy prej tyre janë në reanimacion dhe një 65 vjeç mbahet me frymëmarrje të drejtuar nga aparatura. Por më e keqja nuk ka ardhur akoma. Nuk dua t’ju fus frikën të zbatoni rregullat dhe t’ju shqetësoj por kam detyrë t’ju informoj, të ndaj me ju çdo të vërtetë që ekspertët ndajnë me mua në kohë reale. Nuk jam ekspert, por nuk ju them asgjë të paprovuar nga ana e tyre. Furnizohem me të dhëna dhe statistika dhe para së komunikoj me ju marr miratimin e ekspertëve për çdo fjalë që lidhet me këtë fushë”, tha Rama.
Kryeministri u shpreh se “thënia e të vërtetës është përgjegjësia parësore, sado e hidhur të jetë ajo, kjo është përgjegjësia ime”.
