Një paciente 73-vjeçare, e cila vuante nga disa sëmundje, humbi jetën mesditën e djeshme në spitalin e Durrësit, pasi ishte infektuar nga koronavirusi.
Pacientja ndodhej në pavionin e patologjisë, në një dhomë me dy paciente të tjera.
Pas analizave ajo rezultoi se ishte prekur nga Covid 19, ndërsa alarmi u vu pasi të moshuarës i kishin shërbyer mjekë e infermierë pa masat mbrojtëse ndaj koronavirus. Po kështu e moshuara ishte vizituar nga të afërm të saj, çka krijoi një situatë paniku.
Por, nga analizat rezultoi se asnjë nga 50 mjekët dhe infermierët e spitalit të Durrësit nuk rezulton i prekur nga Covid 19. Gjithashtu edhe dy pacientet që ndodheshin në të njëjtën dhomë.
Dhe ajo që ka mbrojtur stafin mjekësor është maska e oksigjenit që e moshuara ka mbajtur gjatë gjithë kohës që ka qenë në spitalin e Durrësit.
Referuar burimeve nga ISHP, masa e vetme mbrojtëse që ka pasur pacientja, e cila duket se ka shpëtuar një përhapje të koronavirusit, të paktën te stafi mjekësor dhe dy pacientët e tjerë në dhomë ka qenë maska e oksigjenit, që pacientes i ishte vendosur nga momenti i shtrimit, për shkak të problemeve që kishte me frymëmarrjen për shkak të sëmundjeve kronike që kurohej.
