Akademiku Artan Fuga referuar vendimeve të Qeverisë për të mos lejuar përhapjen e koronavirusit, ku i kërkonte privatit lejimin e njërit prind të qëndronte me fëmijën në shtëpi dhe ta rimbursonte, ka trajtuar fenomoenin e pabarazisë sociale. Në një postim në rrjetet sociale, Fuga teksa citon Sartrin shkruan se me këtë vendim ata që kanë do kenë edhe më shumë, ndërsa ata që kanë pak do ia marrin edhe ato që kanë.
“Ti që je në punë, merr rrogën sepse qëndron në shtëpi me fëmijën. Po unë që jam papunë, kur qëndroj me fëmijën si ty nuk kam nevojë për lekë!?” shkruan Fuga.
Reagimi i plotë:
Para interesit egoist, nuk stepen!
Duke parë se çfarë bëhet te ne, por edhe duke ndjekur mediat europiane dhe amerikane, çfarë ve re?
Interesi personal ose egoist përpara jetës të njerëzve në jo pak raste!
Dakord, ndalojini ndeshjet, por shteti të më rimbursojë humbjet nga mosardhja e tifozëve në stadium.
Dakord, mos u mblidhni në vende me njerëz, por për votime hajdeni tani sa nuk u bë qameti!
Si të mos vini në protestat e grave për 8 marsin???
Shkollat i mbyllëm, por provimet e maturës nuk shtyhen!
Detyrat e shkollës? Po qe se nuk ke lidhje Interneti në shtëpi, je i humbur!
Nuk kuptojnë se kjo mund t’u prishi jetën përfundimisht mijra fëmijve! Përgjithmonë ata do të mbesin pas derisa të skualifikohen!
Cfarë pabarazie sociale!
I mbaruam kongreset, mitingjet, ndeshjet, tani mbylluni!
Unë mbyll kufijtë e mi, ti mbyll kufijtë e tu, ata mbyllin kufijtë e tyre!
Unë mbrohem nga ty, apo ti mbrohesh nga unë? Apo të dy mbrohemi nga njeri tjetri?
Kjo e dyta më duket!
Sartri kishte të drejtë atëhere : Ferri janë të tjerët?
Ti që je në punë, merr rrogën sepse qendron në shtëpi me fëmijën. Po unë që jam papunë, kur qendroj me fëmijën si ty nuk kam nevojë për lekë!?
Si thoshte ai i shenjti dhe kishte të drejtë : Ti që ke do të kesh edhe më shumë, ti që ke pak do të t’i marrin edhe ato që ke!
