Shqipëria ndërpret të gjitha fluturimet nga Italia në Shqipëri. Ministrja e Transporteve Belinda Balluku ka njoftuar se ky vendim është marrë pasi Italia tashmë është një zonë e kuqe.
Sot është lejuar që të ulet në Rinas vetëm një avion i Alitalia, që ishte nisur nga Roma. Edhe transporti me anije Itali-Shqipëri është ndaluar për udhëtarët.
“Pas vendimit të marrë nga shteti italian dhe deklaratës së bërë nga Kryeministri Conte për shpalljen e Italisë si zonë të kuqe totalisht, jemi të detyruar edhe ne të ndërmarrim masa për ndërprerjen e fluturimeve nga Rinasi drejt Italisë, apo që vijnë nga Italia drejt Rinasit.
Kështu që tashmë të gjitha aeroportet italiane që kishin mbetur të hapura për operime, siç ishte ai i Romës apo i Barit duke u nisur nga Shqipëria nuk do të jenë më të aksesueshme”, tha Balluku.
Sipas saj, “avioni i fundit, ai i Alitalia është ulur në 10:30 me 64 pasagjerë të cilët kanë kaluar që të gjithë nga kontrolli mjekësor dhe janë regjistruar nga grupet e Ministrisë së Shëndetësisë që ndodhen në aeroportin e Rinasit për t’u kontrolluar edhe në ditët në vazhdim, pasi u kërkohet autokarantinimi të gjithë këtyre personave sapo të ardhur në Shqipëri.
Avioni tjetër është nisur në orën 11:40, avioni i Alitalias drejt Romës dhe këtu ndërpriten të gjitha fluturimet”.
“Avion që vijojnë bosh nga Italia, pa pasagjerë, nuk do lejohen që të vijnë më. Këto avionë mund të marrin pasagjerë për ti dërguar në Itali. Vazhdojmë të bëjmë thirrje që kompanitë duhet të akomodoni me data të tjera personat që kanë prerë bileta në data të ardhshme.
Sonte do të nisen tragetet e fundit Vlorë-Brindizi dhe Durrës-Bari me të gjithë pasagjerët. Pas këtij itinerari nuk do të ketë me udhëtime të tjera. Në rast se autoritetet italiane do jenë të interesuara të vijnë bosh dhe të marrin pasagjerë ne jemi të hapur për këtë bashkëpunim.
Tregëtimi i mallrave nuk do të ketë asnjë penalizim. Nga të dyja palët, Itali-Shqipëri dhe e kundërta edhe nga ajri edhe nga deti, ndërkohë që duhet të ketë ekipe të ministrisë së Shëndetësisë që të monitorojnë ekuipazhin e tyre”, tha Balluku.
Ministrja i bëri apel qytetarëve që të përdorin shërbimet online dhe të mos shkojnë në sportele.
“Është e patolerueshme për kushtet e sigurisë në të cilat ndodhemi për të parandaluar infektimin komunitar, që të paraqiteni në sportele. Drejtojuni shërbimit online”, theksoi Balluku.
