Thirrja për të eleminuar në maksimumin e mundshëm kontaktin fizik nuk është një predikim apo një lutje, por një thirrje që bëhet nga OBSH.
Kështu u shpreh Kryeministri Edi Rama në mbledhjen e jashtëzakonshme të Qeverisë, duke shtuar se duhet të kontribuojmë në një luftë që është botërore, e cila pa asnjë diskutim do të fitohet nga të gjithë ne, por çështja është që të fitohet me sa më pak dëme.
“Është një luftë me një armik fare të padukshëm, i cili hyn në trupin tonë, duke kërcënuar seriozisht shëndetin dhe kërcënuar jetën e atyre që janë më të moshuar ose të sëmurë”, tha Rama.
Kryeministri tha se shkollat nuk u mbyllën që fëmijët apo të rinjtë të mblidhen në disko apo lokale, ndaj duhet të bëjmë detyrën për të mbrojtur veten dhe të tjerët.
“Luftojmë me një armik të padukshëm, me një armik që kërcënon shëndetin tonë. Koronavirusi nuk pyet për histori, ai vetëm godet.
Në këtë fazë, në këtë moment ku jemi në fillimin e kësaj lufte me armikun që ka hyrë në trupat e njerëzve tanë, vazhdoj të ftoj të gjithë ata që kanë mundësi të përdorin një mikrofon, të gjithë ata që kanë ndjekësit e tyre në emisionet që kanë, që të mos abuzojnë, pasi kjo nuk është një nga ato betejat e rradhës, është një luftë që e kemi ne në dorë me zbatimin e këshillave krejt elementare, por shumë thelbësore”, tha Rama.
Kreu i Qeverisë tha se numri i të prekurve është rritur dhe 8 prej tyre janë vazhdë e një kontakti, më pas kemi një të moshuar në Durrës dhe një tjetër djalë në Tiranë.
“Të gjitha rastet janë si pasojë e kontakteve nga Italia”, tha Rama. Ai u shpreh se të gjithë përfaqësuesit e politikës duhet të jenë të gjithë bashkë, dhe jo të ndarë në disa task forca që s’janë parë kurrë në planet.
“Task Force opozitare, presidenciale, digjitale, çfarë do të nxjerrim ne nga ky moment”, tha Rama.
