Nga Boldnews.al
Se ku pa ndonjë video andej nga Kina që dezinfektojnë rrugët e qytetit dhe menjëherë në lëvizje u vu Lali Eri, i cili nxorri dy autobotë dhe pesë kameramanë që filmonin momentin kur sipas Veliajt po dezinfektoheshin rrugët e kryeqytetit, si masë ndaj coronavirusit.
Por Tirana nuk është vetëm Bulevardi Dëshmorët e Kombit për spektaklin e Veliajt, është shumë më tepër dhe jeta është në ato zguqe të Tiranës që të mbyt era e plehrave, ku pisllëku është mbret dhe ato zona nuk kanë parë pikë uji për tu shpëlarë dhe jo më autobote me dezinfektues.
Nëse coronavirusi do të luftohej me propagandë, padyshim që Erion Veliaj do ishte kryestrategu i botës, që do shpëtonte Kinën, Iranin, Korenë apo edhe Italinë fqinje nga ku është përhapur më shumë virusi i rrezikshëm.
Teksa në një autobus ia beh ndonjë punonjës i bashkisë me pompë në duar, para se të nisë punën rutinë, ai duhet të presë kamerat e shefave të propagandës, vetëm atëherë “punon pompa”, vetëm atëherë konsiderohet “virusi i vdekur”, (gjithnjë nëse ekziston diku). Edhe ditën e djeshme Erion Veliaj mbajti një fjalim të gjatë më mëngët përveshur dhe me ca shifra që i lëshonte pa asnjë fre në gjuhë. Gjithçka vërtitej rreth Lali Erit, i cili vijoi me shfaqjen “unë, coranavirusi dhe propaganda”…
Ndërsa bëhet kujdes për të dhuruar spektakël edhe me këtë ngjarje që ka futur në ankth të gjithë vendin, e vërteta është tërësisht ndryshe. Bashkisë së Tiranës iu deshën shumë orë për të “zbuluar” barin dhe bilardon në pronësi të dy të prekurve të parë nga coronavirusi. Fati i “keq” në atë rast ishte se ambientet ndodheshin në rrugën “Irfan Tomini”, dhe jo pranë bulevardit ku vetë Lali Eri do vishte kominoshet speciale, maskën në fytyrën e pudrosur dhe të bënte vetë ai dezinfektimin…
Po ashtu në atë zonë, deri në mesditën e djeshme kur kishin kaluar më shumë se 20 oër nga zyrtarizmi se atë e bir ishin prekur nga coronavirusi nuk u pa asnjë punonjës i Policisë Bashkiake, duhet të ishin të zënë në aksione më “madhore” ndoshta duke gjurmuar këmba- kambës ndonjë të moshuar që shet sallatë dhe qepë të njoma në ndonjë cep trotuari.
Ndotja e madhe që shkaktojnë ndërtimet, kamionët e tonazhit të rëndë, mungesa e higjenës, e ujit të pijshëm janë “vdekja e përditshme” e shumë qytetarëve në Tiranë. Këtë pjesë qytetarët e vuajnë çdo ditë, por “histerizmi kolektiv” sot është përqëndruar në rastet e coronavirusit dhe për aq kohë sa ai të jetë i pranishëm në botë por edhe në vendin tonë, padyshim që Lali Eri do të jetë aktori protagonist i shfaqjes.
