Kreu demokrat Lulzim Basha tha se situata do të ndiqet hap pas hapi, nuk ka vend për panik, por duhet kujdes.
Basha e drejtoi këtë apel pasi në Shqipëri u konfirmuan dy rastet e para të koronavirusit në Shqipëri.
“Duhet të dëgjojmë zërin e mjekëve, jemi në mbështetje të strukturave shëndetësore. Duhet të zbatojmë këshillat e mjekëve”, tha Basha.
Kryetari i PD-së u ka bërë thirrje mjekëve që të kërkojnë çdo gjë që ju nevojitet për të përballuar situatën me koronavirusin.
“Shëndeti i shqiptarëve është në duart tuaja, të gjithë jemi në mbështetjen tuaj. Nuk duhet të nguroni çfarë ju nevojitet. Qeveritë shkojnë dhe vijnë, ata që do mbeten jeni ju.
Kemi një nga stafet më të specializuara te mjekëve, ajo që duhet t’ju japim ju sot janë mjetet e fondet e nevojshme për të përballuar ketë situatë. Të gjithë duhet të dëgjojmë zërin tuaj, sa më shumë të flisni ju aq më të qetë do jenë qytetarët.
Duhet të dëgjojmë këshillat e mjekeve e ti zbatojmë ato. Ju qe vini nga Italia e Veriut drejtohuni për ekzaminime e shmangni kontaktet me të afërmit e qytetarët për 2 javë.
Sot s’është koha për panik por kujdes maksimal, ne do jemi në ndjekje të situatës, ekspertët e specialistët tanë do jenë në shërbim të çdo qytetari”, ka thënë Basha.
