Rivalët e të njëjtit qytet, Manchester United dhe Manchester city do të përballen ditën e sotme për herë të katërt në sezonin aktual.
Man.United edhe pse në formë më të dobët se rivalët e tyre, kryesojnë përballjet mes skuadrave teksa këtë sezon kanë fituar 2 ndeshje dhe humbur 1. Këtë herë favorin e fushës e ka United, që ka privilegjin për të luajtur takimin në “Teatrin e Ëndrrave”, në një duel që në mënyrë të kuptueshme u nevojitet shumë më tepër “Djajve të Kuq”.
Në konferencën për shtyp, trajneri i City-t, deklaroi se i pëlqejnë ndeshje të tilla dhe se një derbi mbetet gjithmonë i veçantë, sidoqoftë Pep rrëfeu se këtë herë situata ndryshon, pasi këtë radhë skuadra e tij luan thjesht për t’u përmirësuar dhe jo për të fituar titullin, ndërsa për United ky takim është tepër i rëndësishëm, sepse “Djajtë e Kuq” luajnë për të siguruar zonën Champions.
Manchester City kërkon fitoren e katërt radhazi në Stadiumin “Old Trafford”, sidoqoftë “Qytetarët” do të jenë pa mbrojtësin Aymeric Laporte, por gjithsesi do të rikthehet mes shtyllave për “Citizens” braziliani Ederson, që në dy ndeshjet e fundit u zëvendësua nga portieri tjetër Claudio Bravo.
Në krahun tjetër duke marrë në konsideratë kalendarin e skuadrave të tjera, ekipi i drejtuar nga Ole Gunnar Solskjaer ka nevojë patjetër për pikë, në këtë derbi, megjithatë trajneri norvegjez u ankua për caktimin e datave, sepse, siç dihet, City luajti në FA Cup ditën e mërkurë, ndërsa United zbriti në fushë të enjten në mbrëmje në “Pride Park”, në një ndeshje ku, ndonëse me shumë ndryshime në formacion, “Djajtë e Kuq” mposhtën 3-0 Derby County-n, ekipin aktual të ish-sulmuesit legjendar të klubit Wayne Rooney.
Ndeshja luhet në orën 17:30.
