Kryeministri Edi Rama nuk ka nguruar të bëjë batuta lidhur me koronavirusin, ndërsa tha se deri më tani Shqipëria mbetet e paprekur.
Rama ndodhet në Shijak, bashkë me një arkitekt italian, lidhur me projektet e rindërtimit.
“Nuk të jap dorën se vjen nga Italia dhe asnjëherë s’i dihet!”, iu drejtua Rama, arkitektit, duke krijuar të qeshura në sallë.
Në vijim ai shtrëngoi duart me arkitektin, por shtoi se nuk dha një shembull pedagogjik me atë dhënien e dorës.
“Jam jo fort i lumtur për këtë bombardim lajmesh që u bëhet njerëzve për koronavirusin që sigurisht përbën një shqetësim të madh por ajo që është e sigurtë është se krahas epidemisë ka një infodemi, të lajmeve të rreme, të komenteve pa bazë shkencore që rrit ankthin, panikun te njerëzit dhe sipas OBSH kjo pengon në përballjen me këtë epidemi.
Duhet të jemi të kujdesshëm sigurisht, racionalë në të gjitha kontaktet ndaj thashë dhënia e dorës s’ishte shumë pedagogjike se nuk është çështje trimërie. Deri sot, s’kemi asnjë rast në Shqipëri. Jo ka ardhur, jo e kemi fshehur.
Asgjë s’është e vërtetë. Mos ardhtë kurrë por i kemi bërë përgatitjet tona, nëse vjen do t’i përballojmë.
Kur Franca që është jo vetëm superfuqi ekonomike, por me sistemin shëndetësor më të njohur në botë, detyrohet të bëjë sekuestrimin e të gjitha maskave… Pse ? Sepse u bë nami kot”, tha Rama.
