Partia Demokratike ka publikuar një audio, ku pretendon se Drejtoresha e Qendrës Shëndetësore nr.8, Blerta Berberi, i kërkon llogari mjekëve sepse komunikojnë me opozitën.
PD shprehet se nga kjo audio provohet se Berberi është një militante partiake që, në vend të shqetësohet për personelin mjekësor dhe qytetarët, u kërkon llogari mjekëve pse komunikojnë me opozitën.
“Kush ka mundësinë të bisedojë me një mjek, e kupton menjëherë se të ashtuquajturat masa të qeverisë kundër koronavirusit te ri janë vetëm propagandë. Më të pambrojturit janë mjekët. Deri kur ne bëmë publike të vërtetën se Qendrat Shëndetësore janë të papërgatitura, atje mungonin edhe masat më elementare.
Video e vërteton plotësisht këtë. Për fat të keq, Drejtoresha e Qendrës Shëndetësore nr.8 Blerta Berberi provoi se është një militante partiake që, në vend të shqetësohet për personelin mjekësor dhe qytetarët, u kërkon llogari mjekëve pse komunikojnë me opozitën për t’u thënë qytetarëve të vërtetën”, thuhet në postimin e PD-së.
Prej disa ditësh opozita ka hedhur akuza në drejtim të qeverisë lidhur me mungesën e mjeteve dhe masave për përballimin e koronavirusit, që ka një përhapje të gjerë në Botë, por duket se ende nuk ka një rast të konfirmuar zyrtarisht në Shqipëri.
