COVID 19 prek edhe Serbinë. Ministri serb i Shëndetësisë, Zllatibor Llonçar, ka konfirmuar rastin e parë me koronavirus në këtë vend.
I infektuari, është një burrë 43 vjeç nga Subotica, i cili e ka vizituar Budapestin.
Sikundër raportohet, motra e tij, e cila jetonte në Budapest, kishte probleme me frymëmarrjen. Ai aktualisht është vënë në karantinë në një spital të Suboticës.
“Ai është kthyer nga Budapesti dhe nuk është ndjerë mirë. Pacienti ka treguar përgjegjësi dhe është izoluar menjëherë. Testi i infeksionit tregoi se ai është pozitiv në koronavirusin e ri”, tha Lonçar, raporton REL.
Ministri i Shëndetësisë shtoi se nuk kishte vend për panikë dhe frikë. “Serbia është e gatshme, çdo gjë që kërkon profesioni, ne do të bëjmë,” tha Lonçar.
Globalisht, autoritetet konfirmuan mbi 97,000 raste të prekura me koronavirus. Shumica e tyre – mbi 80,000 – janë në Kinë, vendin e origjinës së koronavirusit.
Në të gjithë botën, mbi 3,300 njerëz kanë vdekur nga COVID-19, sëmundja që e shkakton koronavirusi.
Në SHBA, numri i të vdekurve aktualisht është 12, ndërsa të infektuar janë mbi 200.
