Nga Boldnews.al
Ministri për Rindërtim Arben Ahmetaj, (një shpikje e kryeministrit Edi Rama si post), me plot pompozitet deklaroi sot se në fundin e vitit 2021, rreth 4000 familje në të gjithë zonat e prekura nga tërmeti do të kenë shtëpitë.
“Javës që vjen shpallet gara ndërkombëtare për 3400 shtëpitë. Do të ftojmë kompanitë ndërkombëtare për të ndërtuar shtëpitë individuale. Do të ftohen ambasadat dhe kompanitë ndërkombëtare për prokurim. Bashkitë kanë nisur vlerësimin e dosjeve individuale. Shtëpitë individuale do të ndërtohen me teknologji të mirë. Rindërtimi do jetë sipas standardit europian, rezistent ndaj tërmeteve deri në 9 ballë. Katër mijë familje që do banojnë në banesat e reja do ta festojnë vitin e ri 2021 në banesat e reja”, tha Ahmetaj.
I shkëlqenin sytë kur deklaroi këto fjalë dhe gati sa nuk “duartrokiti” për veten, duke shitur një paaftësi të madhe të qeverisë, si sukses. Edhe nëse merret në konsideratë afati i dhënë prej tij, familjeve shqiptare do u duhen dy vite qëndrim nëpër çadra të sajuara, pjesa më e madhe donacione.
Janë banesa private kryesisht në zonat rurale të cilat kanë dalë jashtë funksionit pas tërmetit tragjik të 26 nëntorit të vitit të kaluar dhe që prej asaj dite dergjen nëpër çadra familje të tëra. Për ta, nuk ka procedura burokratike të shtetit tonë, pasi truallin ku duan të ngrihen banesat ata e kanë secili, qoftë edhe mbi rrënojat e mbetura pas tërmetit.
Tashmë pritet lëvrimi i fondeve nga BE, por ajo shifër e premtuar prej 1.15 miliardë euro, prej të cilëve 800 milionë euro kredi, do të duhet të shkojë në arkën e shtetit, që menaxhohet nga Ahmetaj pasi të paraqiten projektet konkrete për çdo objekt që pritet të ngrihet.
Pala shqiptare është shumë pas në paraqitjen e projekteve ndaj edhe donatorët e huaj pa u bindur se ato do të jenë konformë rregullave nuk do të lëvrojnë asnjë qindarkë. Edhe shifra e dhënë nga Ahmetaj është një propagandë e radhës, ku në rastin më të mirë, banorët e zonave rurale do të duhet të presin edhe më shumë se dy vite për të pasur një strehë mbi kokë.
Deri në momentin që do kenë çelësat në duar, të paktën edhe për disa muaj duhet të mësohen me premtimet pa “doganë” të ministrit Ahmetaj, i shquar për deklarata bombastike për “qeverisje të përgjshme” edhe atëherë kur në kohën që drejtonte Ministrinë e Finacave çdo ditë shihte një grafik të tmerrshëm në mosrealizimin e të ardhurave, veçarisht nga doganat dhe tatimet. Të dyja këto zëra përktheheshin në kontrabandë masive dhe evazion fiskal. Për “punë të mirë” Rama e ripromovoi Ahmetajn, i cili “mbiu” nga rrënojat e tërmetit dhe po shfaqet si “bob ndërtuesi”!
