Nxënësit e shkollës Sami Frashëri në Tiranë protestuan pasditen e djeshme dhe bojkotuan mësimin në dy orët e para, duke kërkuar shkurtimin e orëve të mësimit nga 45 në 35 minuta, ose zhvillimin e mësimit gjatë paradites.
Protesta ka dhënë rezultat, pasi të paktën këtë javë, nxënësit kanë privilegjin të fitojnë rreth 1 orë nga pasditja e tyre, pasi orët e mësimit do të jenë 35 minutëshe.
Por ajo që ka tërhequr vëmendjen ka qenë angazhimi i zyrtarëve të DAR-it Tiranë për të sfumuar protestën e gjimnazistëve.
Boldnews.al ka mësuar nga denoncimet e nxënësve se një prej këtyre zyrtarëve, i identifikuar nga nxënësit si Sulejman Keta, ka shkuar në mjediset e shkollës dhe me një arrogancë ka mbledhur një përfaqësi të tyre.
Sikundër mësohet fillimisht ai ka folur mbi shkollën dhe nxënësit që ajo ka nxjerrë ndër vite, më pas ka folur për tërmetin dhe dëmet që ai ka shkaktuar, ndërsa më pas ka ngritur tonet duke ushtruar presion që protesta të ndërpritej dhe mësimi të zhvillohej rregullisht.
Por duket se përballë ka gjetur nxënës kurajozë që e kanë kundërshtuar dhe “marrëveshja” e arritur ishte që këtë javë orët të bëhen të shkurtuara, pra nga 45 në 35 minuta, ndërsa për vijimësinë do të diskutohet.
Boldnews.al u interesua në DAR Tiranë dhe Ministrinë e Arsimit, lidhur me situatën e krijuar me gjimnazistët e Sami Frashërit.
E ndërsa nga Ministria e Arsimit nuk ishin në dijeni nga zyra e DAR Tiranë, portalit iu tha se ka pasur një diskutim normal, ndoshta me pak tone të larta, për shkak se kërkesa që parashtrojnë nxënësit nuk qëndron.
“Nuk mundet që shkurtimi i orëve të mësimit të realizohet vetëm për një shkollë”, ishte përgjigjia që mori Boldnews.al.
Ndërkohë që sipas Ministrisë së Arsimit godinat shkollore janë kompetencë e bashkive, ndërsa procesi mësimor i Drejtorive Arsimore Rajonale. Lidhur me atë se çfarë do të ndodhë me godinën ekzistuese të shkollës Sami Frashëri, burime zyrtare nga Ministria sqarojnë se nuk përjashtohet varianti për rindërtimin e saj, sikundër çdo opsion tjetër që do të vlerësohet nga grupi i specialistëve të fushës.
Prej dhjetorit të 2019, nxënësit e gjimnazit janë transferuar drejt shkollës “Çajupi” ku zhvillojnë mësimin në orët e pasdites.
Shkaku është se tërmeti i 26 nëntorit ka dëmtuar shkollën e rikonstruktuar në 2018 nga Kryebashkiaku Erion Veliaj. Dëmtimi është vlerësuar serioz dhe godina e shkollës në fjalë, mund të shkojë drejt shembjes.
Shkollat me turne në kryeqytet janë një problem i hershëm, por që u premtua nga Veliaj dhe Rama se do të gjendeshin zgjidhje, duke ndërtuar shkolla të reja. Gjithsesi problemi vijon jo vetëm me nxënësit e gjimnazeve, por edhe të 9-vjeçareve.
