Skuadra e Cagliarit ka konfirmuar se trajneri Rolando Maran është shkarkuar nga stoli drejtues të klubit.
Vendimi erdhi pas formës shumë të dobët sportive të Cagliarit, të cilët regjistronin 12 ndeshje pa asnjë fitore. Kuqeblutë e filluan sezonin mjaft mirë por që nga pushimet e dimrit, skuadra është futur në krizë të thellë.
Klubi e ka bërë të ditur lajmin në mediat sociale, teksa e falënderon 56-vjeçarin për kompetencën dhe profesionalizmin që ka treguar gjatë qëndrimit prej 1 viti e gjysmë si trajner i Cagliarit.
Sipas mediave italiane, favoriti për të marrë drejtimin e klubit është, Walter Zenga, i cili ka mbrojtur portën e Interit për 12 sezone në vitet 1982-1994, duke fituar një herë Serinë A (1988-89), një herë Superkupën e Italisë (1989) dhe 2 herë Europa Ligën që në atë kohë njihej si Kupa Uefa (1991, 1994).
