Rama akuza mediave, Metës dhe FRESSH-it / “Beslidhja apo Beslikja, këtu duhej të fliste Mamica”

Kryeministri Edi Rama nuk kurseu kritikat ndaj medias në ditën e 3-të të Kongresit të PS-së, lidhur me pasqyrimin e lajmeve të kronikës së zezë.

Gjithashtu Rama nuk ka kursyer akuzat në drejtim të Presidentit Ilir Meta dhe manifestimit të 2 marsit të thirrur prej tij, ndërsa tha se këtu duhej të fliste “Mamica”.

Rama tha se nëse mediat në Itali apo SHBA do të merreshin me kronikën e zezë atëherë lajmet do të zgjasnin me orë dhe s’do të maronin kurrë.

“Shqipëria ka numrin më të ulët historik të vrasjeve, por media pasqyron çdo lajm të kronikës së zezë, të cilat zenë një hapësirë shumë të madhe”, tha Rama.

Në vijim, duke iu drejtuar të rinjve, Kryeministri tha se FRESSH nuk mund të jetë ai që ishte para 4 viteve.

“Teknologjia ka ndryshuar jetën e të rinjve, është një instrument që mund t’i ftojmë të tjerët që të shikojnë dhe t’i ndajmë, t’i ftojmë në debate që kanë sens, por jo si ato debatet që marrin vendin peng si ajo Beslidhja dhe Besliken”, tha Rama. Sipas Ramës, këta të Beslidhjes po shfaqen sikur pas tyre vendi s’do ekzistojë më.

Në vijim Rama duke iu drejtuar të rinjve he të rejave, anëtare të FRESSH-it, tha se vajzat janë 1 vit përpara djemve përsa i takon leximit.

“E kuptoni sa të lodhur jeni, ndaj punët që s’dini ti bëni lërjani vajzave dhe mësoni prej tyre si bëhen”, iu drejtua Rama, djemve të FRESSH-it.

LEXO EDHE  ‘Tërbohet’ Lana/ Ja çfarë ndodh në Tiranë pas reshjeve të shiut (Video)

Më pas ai tha “në protestën e zhvilluar nga studentët, pjesa më e madhe e tyre ishin anëtaë të FRESSH-it. E mendoni për një moment Saliun Kryeministër dhe FRPD që protestonte për largimin e ministres së Arsimit”.

“E shikoni çfarë lirie kemi ne në rradhët tona? PS është e hapur për të pranuar ndryshimin. Këtu është bërë fol fol, po kush po të pyet, ndaj edhe FRESSH duhet të krijojë një model dhe hapësirë të re, duke kapërcyer modelin tradicional.

Nëse do të kemi edhe 4 vjet këtë model FRESSH-i, atëherë nuk na duhet fare si model. Kjo vlen jo për individët, por për mënyrën sesi është organizuar”, tha Rama.

Lidhur me punësimin, Rama tha se sot kemi nivelin më të ulët të papunësisë, por problem mbetet fakti se puna që kryhet nuk paguhet në nivelin që duhej të ishte.

“Por cila qeveri, apo cili deputet nuk do të donte të votonte rritjen e pagave? Por mundësitë kaq janë, pasi është njëlloj sikur ju t’i thoni prindërve t’ju japin 5 fishin e atyre që ju japin sot. Prindërit do e kenë të pamundur, ose do t’u duhet të marrin borxh, ose të shesin shtëpinë”, tha Rama.