Titullin kampion ose e pret shkarkimi i menjëhershëm. Ky është kushti që Orges Shehi ka pranuar për t’u bërë trajneri i ri i skuadrës së Kukësit dhe konfirmimi vjen nga presidenti i verilindorëve, Safet Gjici. Ky i fundit ka bërë të qartë se ish-portierin e Skënderbeut e pret një punë e vështirë me vetëm një objektiv para.
“Trajneri i ri do të jetë Orges Shehi. Ai është i ri dhe me përvojë sidomos si futbollist. Unë ia kam bërë të qartë objektivin titull dhe kam besim tek ai. Nëse nuk e fitojmë atëherë do e shkarkoj si të tjerët, kjo është puna e trajnerëve”, ishte kushti i panegociueshëm që Gjici konfirmoi për “Top Channel”.
“Shkëmbi është një trajner i zoti, kam biseduar me të dhe Skënder Gegën, por nuk e ktheva unë Gegën nga Amerika’, ishte komenti i tij për dy alternativat e tjera të stolit të skuadrës së tij. Ndërkohë, ai nuk e fsheh zhgënjimin për epokën e kaluar me Duron.
“Duro duhej të jepte vetë dorëheqjen e jo ta shkarkoja unë. Megjithatë i uroj gjithë të mirat në karrierën e tij’’, tha Gjici.
