Sekretari i Përgjithshëm i PS-së, Taulant Balla në fjalimin hapës në Kongresin e PS, ka sulmuar Presidentin Ilir Meta. Balla e krahasoi Metën me “Ver Llapën”, një si sëmurë mendon në Tiranë.
“Ka disa që na kritikojnë sot për koalicionin me LSI gjatë mandatit të parë ose shumë na thonë tani edhe pse zgjodhëm Ilir Metën President. Këtyre kritikëve ju them se ne nuk jetuam për zgjedhjet e radhës në mandatin tonë të parë, nuk shitëm qëllimet dhe nuk bëmë kurrë Pazar për objektivat në mandatin e parë. Ne bëme punë të mira në atë Koalicion dhe Ilir Metës i dhamë thjesht hakun, si pjese e koalicionit (pasi presidentin me vetëm votat tona se zgjidhnim dot) po edhe si më i miri president nga radhët e opozitës realisht. Ne nuk mund ta parashikonim dot, askush se dinte, që Ilir Meta do katandisej si Veri që u nxjerr gjuhën njerëzve tek udhëkryqi i 21 dhjetorit”, tha Balla.
Akuza lëshoi dhe ndaj kundërshtareve politike.
“Prej korrikut 2016, në Shqipëri rreshtimi i krahëve në politikën shqiptare nuk është vetëm në nocionet bazë e majtë – e djathtë, shumicë – pakicë apo pozitë – opozitë. Prej atij momenti në Shqipëri u krijua një aleance e pështirë kundër Reformës në Drejtësi, me Sali Berishën në ballë, Ilir Metën pas shpine, Lulzim Bashën në krah dhe Monika Kryemadhin në çizme! Reforma në Drejtësi ishte dhe është angazhimi ynë themelor prej kur e propozuam për herë të parë në vitin 2008 nevojën e një reforme të tillë dhe jetësimin e të cilës e filluam sapo morëm besimin e shqiptarëve”, tha Balla.
E teksa ai akuzon kundërshtarët politikë, ata prej kohësh janë shprehur se PS e ka kapur reformën në drejtësi. Madje, kreu i shtetit Ilir Meta, më 2 Mars, ka thirrur një tubim në Tiranë, kundër asaj që ai e cilëson kapje e Gjykatës Kushtetuese nga mazhoranca.
