Zegjine Sollaku, do të jetë gjyqtarja e parë, kallzimi në ngarkim të së cilës, përfundon në SPAK. Prokuroria e Durrësit, në një vendim të saj me 25 shkurt, firmosur nga drejtuesja Anita Jella, ka shpallur moskompetencën. Prokuroria pas dy vendimeve të gjykatave, vjen në një moment pamundësie hetimi dhe vendosë ta përcjellë në strukturat e reja të hetimit të zyrtarëve të lartë. Prokurora e Rrethit Gjyqësor Durrës thekson se vendosa:
-Shpalljen e moskomptencës lëndore për hetimin penal Nr 1149 të vitit 2019.
-Kalimin e akteve procedimit penal nr 1149 të vitit 2019 Prokurorisë Speciale, Pranë Gjykatës Kundër Korrupsionit dhe Krimit të Organizuar Tiranë.
Prokuroria që do të marrë aktet, nëse çmon se nuk është kompetencë e saj hetimi i këtij procedimi penal, mund të njoftojë Prokurorin e Përgjithshëm.
Sipas vendimit të prokurorisë, thuhet se në interpretim të nenit 75/a të Kodit të Procedurës Penale, rezulton se vepra penale e ushtrimit të ndikimit të paligjshëm ndaj personave që ushtrojnë funksione publike..: të parashikuar nga nenet 245/1 të Kodit Penal, është në kompetencë lëndore të Gjykatës Kundër Korrupsionit dhe Krimit të Organizuar. Prokuroria e Durrësit thotë se nuk ka kompetencë as të kryejë veprime proceduriale hetimore në lidhje me këtë procedim penal, as t’i drejtohet Gjykatës së Shkallës së parë Durrës, me një kërkesë tjetër me objekt pushimin e çështjes penale. Ndërkohë avokatët e kallzuesit, kërkojnë nga Këshilli i Lartë Gjyqësor, marrjen e një vendimi pezullimi për gjyqtaren Zegjine Sollaku, derisa të shprehet Prokuroria dhe Gjykata Speciale, për përgjegjësinë ose jo penale të saj.
Historiku
Prokuroria pranë Gjykatës së Shkallës së Parë Durrës, më herët ka shprehur dy qëndrime për këtë çështje, të nënshkruara zyrtarisht, njërën nga drejtuesja e saj Anita Jella dhe tjetrën nga Edmond Koloshi, drejtues i seksionit, me urdhër dhe delegim nga drejtuesja e Prokurorisë Jella, shkresa këto konceptuara nga Prokurori Ndriçim Troplini. Ndonëse japin përgjigje jo të njëjtë, ata njëlloj marrin nënshkrimin nga titullari i Prokurorisë. Subjekti denoncues Natasha Petrela, ka kërkuar më përpara me datë 28 qershor të 2019, nga Prokuroria e Durrësit, të dhëna lidhur me kallzimin penal nr 1149 të paraqitur prej saj.
Në kërkesën e saj Peterela shkruan se: Prokurorisë së rrethit gjyqsor Durrës, Prokurorit të çështjes Ndriçim Troplini, Unë kërkuesja Natasha Petrela, kam paraqitur kallzim penal ndaj shtetases Zegjine Sollaku, për veprën penale të shpërdorimit të detyrës. Nga data e paraqitjes së kallzimit penal, nuk kam marrë dijeni nëse ka një procedim penal të regjistruar dhe nëse po, çfarë veprimesh hetimore janë kryer në funksion të këtij procedimi. Kërkoj të më lëshohet një vërtetim regjistrim procedimi penal dhe kopje të akteve hetimore të deritanishme. Po në të njëjtën datë me 29/06/2019, Prokuroria pranë Gjykatës së Shkallës së Parë Durrës, i kthen përgjigje zonjës Natasha Petrela.
Shkresa është konceptuar nga Prokurori i çështjes Troplini, firmosur nga Edmond Koloshi drejtues seksioni, me urdhër dhe delegim të drejtuesit të Prokurorisë Anita Jella. Në të thuhet konkretisht se: Në përgjigje të shkresës suaj datë 28/06/2019 ju informojmë se Prokuroria pranë Gjykatës së Shkallës së Parë Durrës, ka regjistruar procedimin penal nr 1149 të vitit 2019, për veprën penale të parashikuar nga neni 245/1 të Kodit Penal. Ky procedim është në fazën e hetimit. Dokumenti tjetër është sërish i konceptuar nga Prokurori Ndriçim Troplini dhe nënshkruar nga drejtuesja e Prokurorisë Anita Jella thotë se: “Zonja Sollaku gjyqtare në Gjykatënn e Apelit ka bërë një kërkesë dhe Prokuroria është përgjigjur sot me datë 18 korrik 2019.
Në përgjigjen e Prokurorisë thuhet konkretisht se: Zonja Zegjine Sollaku, në përgjigje të kërkesës suaj, ju informojmë se Prokuroria pranë Gjykatës së Shkallës së Parë Durrës, nuk ka rregjistruar procedim penal ndaj gjyqtares zonja Zegjine Sollaku, me detyrë gjyqtare në Gjykatën e Apelit Tiranë. ..” Prokuroria nuk thotë që ka vendim mosfillimi, nëse ka një kallzues që pretendon të kundërtën. As nuk bën me dije se ka një pushim, që duhej të ishte marrë nga Gjykata. Por në kërkesën e Petrelës me emër konkret, ajo përgjigjet se ka një kallzim. Zonjës Sollaku, e njëjta prokurori, i njëjti prokuror konceptues i shkresave, i përgjigjet po zyrtarisht me datë 18 korrik 2017, se ndaj saj nuk ka asnjë procedim penal. Shkresat janë zyrtare dhe kundërshtojnë njëra-tjetrën. Po çfarë ka në dosjen nr 1149??!! Tashmë ajo do të jetë në një tjetër Prokuroi, në atë të Posaçme. Do të jetë SPAK, që do të marrë një vendim të ri. /Shijak tv/
