Nga “testi i idiotit” te rritja e gjobave/ Propozimet për ndryshimet në Kodin Rrugor: Kur pezullohet patenta

Policia e Shtetit ka zbardhur këtë të enjte “propozimet kryesore për ndryshime të Kodit Rrugor”. Ndryshimet e paralajmëruara më herët nga ministri i Brendshëm, sipas policisë, synojnë të rritin Sigurinë Rrugore në vend.

Propozimet pritet të depozitohen së shpejti në Kuvend në formën e një projektligji.

Përparësia

Nga 1-3 mijë lekë, rritet nga 5-8 mijë lekë gjoba për shoferët që nuk respektojnë përparësinë në rrugë. Kur efektivët rrugorë konstatojnë se shkelja është përsëritur 2 herë brenda vitit, pezullohet patenta deri në 1 vit dhe hiqen 5 pikë nga leja e drejtimit.

Motoçikletat

Si ndryshim në Kodin Rrugor për personat që drejtojnë motor, propozohet që veç kaskës mbrojtëse, të jetë i detyrueshëm gjatë natës, në errësirë, edhe mbajtja e jelekut fosforishent. Gjoba në këto raste do të jetë deri në 1-3 mijë lekë.

Rripi i sigurimit

Gjobë 1-3 mijë lekë do të marrë një shofer, nëse pasagjerët në makinën e tij nuk kanë të vendosur rripin e sigurimit.

Parakalimi i gabuar

Edhe nëse bën parakalim të gabuar në rrugë, gjoba do të jetë më e lartë se aktualja, që është nga 1-3 mijë lekë. Gjoba do të rritet nga 5 – 10 mijë lekë. Po ashtu, shtohet edhe pezullimi i patentës me 1 muaj.

Telefoni

Gjoba për celularin në timon rritet nga 1 – 1.5 mijë lekë që ishte, në 5-15 mijë lekë. Por kur shkelja përsëritet 3 herë brenda vitit, vlera e gjobës dyfishohet, që do të thotë se arrin deri në 30 mijë lekë. Por me këtë shkelje, merret masë ndëshkuese edhe me pezullimin e lejes së drejtimit për 3 muaj, si dhe hiqen nga patenta 10 pikë.

Me ndryshimet në Kodin Rrugor, pritet të ashpërsohen masat për shoferët që përdorin celularin. Nëse je duke i dhënë makinës, dhe thjesht mban celularin në dorë, gjoba propozohet të jetë 5 mijë lekë. Nëse i jep makinës duke folur në telefon, gjoba rritet në 10 mijë lekë. Më e lartë gjoba është nëse e përdor telefonin duke shkruar teksa je në timon, në një vlerë që propozohet të jetë 15 mijë lekë.

Këshillimi

Ministria e Brendshme propozon që këshillimi nga efektivët rrugor për shkelje të lehta në rrugë, të mos jetë thjesht gojarisht, por të administrohet në sistemet e policisë. Nëse brenda 1 viti, shoferi konstatohet me të njëjtën shkelje për të cilën thjesht është këshilluar (pa masë administrative), atëherë atij i vendoset masa maksimale e parashikuar për shkeljen.