Ndryshimet e Kodit Rrugor/ Çudirat e propozimit që do të bëjnë lëmsh policët e trafikut

Nga Boldnews.al

Dëshira e madhe e drejtuesve të lartë policorë për të forcuar masat e gjobave për shoferët, i ka kthyer në hartues të disa rregullave absurde, në radhë të parë për efektivët që do të duhet t’i zbatojnë në praktikë.

Në një dokument të publikuar paraditen e së Enjtes, qeveria pritet të miratojë disa ndryshime në Kodin Rrugor, të cilat, synojnë, me të drejtë parandalimin dhe shmangien e aksidenteve rrugore për shkak të përdorimit të telefonit në timon.

Por, përcaktimet në këtë dokument, në rastin më të mirë, janë të pazbatueshme ose do të konfondojnë policët rrugorë.

Më konkretisht, dokumenti parashikon:
– “Personi që drejton mjetin me telefon në dorë, dënohet me 5 mijë lekë gjobë”;
– “Personi që drejton mjetin duke shkruar mesazhe mesazhe, dënohet me 15 mijë lekë gjobë”.

Pra, kushdo shofer që konstatohet duke shkruar mesazhe telefonike gjatë kohës që drejton mjetin, dënohet me masën e rëndë financiare 15 mijë lekë. Ndërkohë, shoferët që vetëm e mbajnë telefonin në dorë, pa kryer asnjë veprim me të, dënohen me 5 mijë lekë.

Hartuesit, të zellshëm për të shtuar sa më shumë penalitete, mesa duket, kanë propozuar disa masa që krijojnë më shumë amulli në qarkullimin rrugor.

Është e paqartë se çfarë kanë pasur parasysh hartuesit kur kanë parashikuar këto dy masa. Pikëpyetjet normale që mund të krijohen janë: “Si do të arrijnë efektivët e Policisë Rrugore që të përcaktojnë saktësisht nëse një drejtues mjeti është duke shkruar mesazh në telefon apo thjesht po e mban në dorë”?

Duhet mbajtur në konsideratë se, një vështrim i Policit Rrugor, ndoshta edhe i gabuar, ndikon drejtëpërdrejtë në financat e drejtuesve të mjetit.

LEXO EDHE  Mosrespektimi i masave anti-Covid 19, ISSH gjobit 5 biznese

Për më tepër, është interesante të shihet nëse propozimi për ndryshimet në Kodin Rrugor ka parashikuar pajisjen e efektivëve të Policisë Rrugore me mjete (nëse ekzistojnë të tilla) që do t’i ndihmojnë për të përcaktuar saktësisht nëse një shofer po shkruan mesazhe apo thjesht po e mban në dorë telefonin.

Nga ana tjetër, propozimet parashikojnë që, vetëm thjesht mbajtja e telefonit në dorë, gjobitet me 5 mijë lekë të reja.

Edhe në këtë pikë shtrohet një pikëpyetje; Çfarë pasoje sjell në sigurinë rrugore mbajtja e telefonit në dorës, si send, pa folur dhe pa shkruar mesazhe?

Nëse mbajtja e telefonit si send në dorë përbën rrezik potencial në trafikun rrugor, atëherë, një rrezikshmëri të tillë mund të mbartin edhe objekte të tjera, si syze, paketë, çelësa, cigare ose çdo mjet tjetër, të cilin drejtuesit e mbajnë në dorë thjesht si “hajmali” ose si anti-stres për trafikun e ngarkuar të rrugëve në qytetet kryesore shqiptare.