Koronavirusi/ Rama apel qytetarëve: Fikni TV, referojuni librave të shenjtë

Kryeministri Edi Rama i ka drejtuar një apel qytetarëve që pavarësisht shqetësimeve që krijohen si rezultat i situatës së krijuar kudo në Botë nga koronavirusi, të ruajnë maksimalisht qetësinë dhe të mos kalojnë në panik.

Rama e ka cilësuar shpërthimin e koronavirusit një situatë që ka zënë në befasi gjithë botën, ndërsa shtoi se shqiptarët në kushtet kur janë prekur nga infodemia, përhapja e lajmeve të rreme, duhet ta përballojë me shumë besim dhe të mos dëgjojnë lajme apo të lexojë në internet, por duke i drejtuar mesazheve të librave të shenjtë dhe Papa Françeskut.

“Një virus, përhapja e të cilit për fat të keq dhe kjo është e pashmangshme dhe problematike po shoqërohet me atë që OBSH e quan infodeminë, lajmet e pakonfirmuara, të rreme, që marrin dhenë dhe influencojnë mbi qëndrimin dhe sjelljen e konsumatorëve të lajmeve.

LEXO EDHE  Kultivimi i narkotikëve, shpallet në kërkim kryeplaku/ Arrestohet një 45-vjeçar

Këtë situatë duhet ta përballojmë me shumë besim. Ndaj ju sugjeroj të mbyllni televizorët, të fikni telefonat dhe ti drejtoheni mesazheve të Papa Françeskut apo Kuranit e Biblës se sa të humbisni kohë me lloj-lloj marrëzish e poshtërsish që njerëz me ligësi shpirtërore shpërndajnë duke bërë atë që është çnjerëziore dhe nga pikëpamja profesionale e padobishme”, tha Rama.

Në vijim ai theksoi se situata është shfaqur në më shumë se sa një formë, rendja e ethshme për më shumë informacion përmes klikimeve që sjell shumëfishim të titujve që përmbajnë fjalën koronavirus apo viktimë, por nga ana tjetër një karakteristikë jo fort e përhapur është përpjekja individuale apo e grupeve të caktuara për të shfrytëzuar frikën, për të nxitur panikun, për të prodhuar alarme të vazhdueshme për interesa mizerabël politike e mediatike.