OFL i kërkon deklarimin e pasurisë mikut të Gjushit (EMRAT)

FOTO ILUSTRUESE

Operacioni Forca e Ligjit i ka dërguar sot formularët e vetëdeklarimit dy shtetasve me banim në Shijak, në kuadër të operacionit anti-KÇK që nisi gati tre javë më parë.

Sipas burimeve zyrtare, në vijim të veprimeve, bazuar në Aktin Normativ, OFL u ka dërguar kërkesat për vetëdeklarim të pasurisë, shtetasve: A.B., dënuar nga Gjykata e Rrethit Gjyqësor Durrës, për veprën penale “Vrasja me paramendim” dhe A.K.,  dënuar nga Gjykata e Pisas, Itali, për veprën penale “Trafikim i narkotikëve”.

“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme”, thuhet në njoftimin e OFL-së.

Burime bëjnë me dije se këta shtetas janë Astrit Balliu, alias Avdyli dhe Astrit Keçi.

Kush është Astrit Balliu, alias Avdyli?

Astrit Balliu njihet si koka e grupit të Shijakut, të arrestuar në 21 tetorit të vitit 2018, pjesë e dosjes ende nën hetim 339/1.  Në tetor të vitit 2019 policia vuri në pranga 19 persona, mes tyre dhe drejtuesin Astrit Avdylin me vëllezërit e tij dhe anëtarët e bandës, të cilët akuzohen për prodhim dhe trafik droge, grup të strukturuar kriminal dhe pastrim parash.

Ndërkohë që nga përgjimet e BIRN për shit-blerje votash, tregonin se ai së bashku me vëllain tjetër Altin Avdyli kanë drekuar të paktën dy herë me ish-kryebashkiakun e Durrësit Vangjush Dakon në fillim të vitit 2017.

LEXO EDHE  COVID 19 rrëzoi të gjitha hipotezat/ Çfarë po ndodh me virusin?

Vrasja e vitit 1996, Astrit Avdyli mori hak për kushëririn

Në vitin 1996 u vra më armë zjarri, Dritan Avdyli, kushëriri i parë i Astrit Avdylit kokës së bandës. Ai i kishte vendosur një gjobë biznesmenit Tefik Hyka, pronari i fabrikës së tullave në Vlorë.

Dritan Avdyli u telefonua nga një bashkëpunëtor shijakas i Tefik Hykës për të shkuar në zonën e “Katër Rrugëve të Shijakut” për të marrë paratë që i kishte kërkuar Tefikut, por në momentin që bashkë me shokun arrin në lokal goditet me një breshëri plumbash nga një vrasës me pagesë i ardhur nga Tirana, Durim Kusi.

Astrit Avdyli, djali i xhaxhit të Dritanit, i dënuar më parë për prostitucion në Itali merr hak duke vrarë në qendër të Shijakut personin që nxori në pritë Dritanin. Ndërkohë që spiralja e hakmarrjes nuk u ndal me kaq, pasi vëllai i Astritit, Shkëlqimi vrau në Tiranë, Durim Kusin. Ndërkohë që Jasmin Avdyli është dënuar më parë në Itali pasi u përfshi në vrasjen e një marshalli italian. Ai kishte disa vite që ishte liruar nga burgu dhe jetonte në Shijak.