Virusi kinez në kufi/ Ministria konfirmon: Shqipëria e paprekur

Teksa në vendet fqinje shtohen rastet e prekura nga koronavirusi, autoritet konfirmojnë se Shqipëri nuk ka asnjë person të infektuar me COVID-19.

Zëvendësministrja e Shëndetësisë Mira Rakacolli deklaroi këtë të mërkurë se deri më tani janë testuar 13 persona dhe rastet kanë rezultuar negative. Ajo bëri apel që të gjithë personat që shfaqin simptomat e virusit kinez, si kollë, temperaturë dhe mbi të gjitha vështirësi në frymëmarrje, të kontaktojnë numrin e Urgjencës Kombëtare – 127.

“Janë testuar 13 raste të dyshuara tek udhëtarë që kanë hgistori udhëtimi me vendet e prekura nga koronavirusi i rid he rezulton deri në këto momente, se, Shqipëria nuk ka asnjë rast të konfirmuar me COVID-19”, tha Rakacolli.

Zv/Ministrja deklaroi në komunikimin e përditshëm me median se Ministria e Shëndetësisë dhe Mbrojtjes Sociale ka vendosur në dispozicion të spitaleve një fond shtesë për mjetet e mbrojtjes personale.

“Pas mbledhjes së djeshme të Komitetit të Ekspertëve, Ministria e Shëndetësisë ka vendosur rialokimin e një fondi shtesë prej 1 milion dollarë vetëm për shtimin e stokut të mjeteve të mbrojtjes personale në strukturat shëndetësore. Ministria e Shëndetësisë siguron se aktualisht, të gjitha strukturat spitalore kanë gjendje sasinë e nevojshme të mjeteve të mbrojtjes personale për këtë fazë në të cilën ndodhemi”, tha Rakacolli.

LEXO EDHE  Më falet mua të vdes nga një grip? Mjekja e njohur: Mbrohuni nga Covid-19, tashmë e dimë

“Nga survejanca e përforcuar në pikat kufitare rezulton se janë kontrolluar dhe këshilluar 4800 udhëtarë që kanë një histori udhëtimi me vendet e prekura nga shpërthimi komunitar i koronavirusit, gjatë 24 orëve të fundit. Ministria e Shëndetësisë dhe Mbrojtjes Sociale rekomandon qytetarët që vijnë nga rajonet e prekura, të vetëkarantinohen për një periudhë prej 14 ditësh. Ministria e Shëndetësisë rekomandon qytetarët që kanë udhëtuar në vendet e prekura dhe kanë shenjat e infeksionit viral, temperaturë, kollë dhe sidomos insuficencë respiratore (vështirësi në frymëmarrje) të telefojnë 127 për të marrë udhëzimet e duhura se si të veprojnë”, shtoi.

E pyetur lidhur me rastin e djeshëm, ku një person humbi jetën në Tiranë, Rakacolli tha se kishte insuficiencë respiratore dhe ishte i prekur nga virusi i gripit stinor. “S’kishte lidhje me koronavirusin”, konfirmoi zëvendësministrja. /BoldNews/

LEXO EDHE:

*Koronavirusi në Itali/ 12 viktima, shërohet pacienti i parë i evidentuar

*Koronavirusi prek Greqinë, e infektuara gruaja 38-vjeçe që kishte udhëtuar në Itali