Lyoni pret mbrëmjen e sotme ora 21:00, Juventusin, në fazën me eliminim direkt të Ligës së Kampioneve.
Kampionët italianë, janë favoritët e mëdhenj për të kaluar më tej duke parë dhe ecurinë në grupet respektive, ku bardhezinjtë u kualifikuan me lehtësi, ndërsa Lyoni edhe pse ishte pjesë e një grupi të dobët, u rendit e dyta me vetëm 8-të pikë të grumbulluara.
Performanca e skuadrës franceze në Ligue 1 ka qenë poshtë pritshmërie, teksa aktualisht renditen në vendin e shtatë, 28 pikë pas kryesuesve të PSG-së.
Cristiano Ronaldo kthehet në “habitatin” e tij në një kompeticion ku ai ka shkruar historinë. Nëse marrim parasysh shifrat në fazën me eliminim direkt, CR7 ka realizuar 65 herë. I dyti në këtë renditje është Messi, por me “vetëm” 46 gola.
Hera e fundit në të cilën dy skuadrat janë përplasur me njëra tjetrën, ishte në fazën e grupeve të vitit 2016, aty ku Juventus mori një fitore ndërsa ndeshja tjetër u mbyll në barazim 1-1.
Për sa i përket mungesave te të dyja skuadrat, vendasit do të duhet të bëjnë pa yjet e tyre si Memphis Depay, Jeff Reine-Adelaide dhe Youssef Kone. Për Juventusin do të mungojnë Douglas Costa dhe Gonzalo Higuain. Në dyshim të madh është Miralem Pjaniç i cili edhe pse i riaftësuar plotësisht nuk ka ritmin e duhur për të përballuar një ndeshje të tillë.
Formacionet e mundshme:
Lyon: Lopes; Denayer, Marcelo, Marcal; Duboism Tousart, Guimaraes, Comet, Terrier, Toko-Ekambi, Dembele. (3-4-1-2).
Juventus: Szczesny; Danilo, Bonucci, De Ligt, Alex Sandro; Matuidi, Ramsey, Bentancur, Cuadrado; Dybala, Ronaldo. (4-4-2).
