Laboratori i Policisë Shkencore ka publikuar përgjigjen e analizave nëse kryebashkiaku i Bulqizës, Lefter Alla është apo jo përdorues lëndësh narkotike, pas videos që u bë publike në media ku ai shihej duke thithur diçka me hundë.
Përgjigja e Laboratorit të Policisë Shkencore, nuk ishte aspak surprizë, pasi Allës ju kërkua t’i bëhej vetëm testi i urinës dhe gjakut, e cila mund të analizojë deri në 48 orë, nëse personi është apo jo përdorues kokaine, dhe në rastin konkret Alla rezultoi jo përdorues.
Por ajo që ngriti më shumë pikëpyetje ishte se përse SPAK nuk kërkoi që analizat për përdorim drpge Allës t’i bëheshin përmes fijeve të flokut?
Lidhur me përgjigjen e analizave ka reaguar edhe ish-deputeti demokrat, Flamur Noka, i cili për t’i dhënë një përgjigje të saktë nëse Alla është ose jo përdorues droge ka kërkuar ndihmë nga kryeministri.
Përmes një postimi në Facebook Noka me ironi shkruan se përgjigjen se çfarë tjetër mund të merret me hundë përveç kokainës mund ta japë vetëm kryeministri Edi Rama si ekspert i fushës.
Ja postimi i Nokës:
“Nuk është ashtu siç duket”
Skena që kemi parë është kjo: kryebashkiaku i Bulqizës, me anë të një karte, bën gati 2-3 viza të holla te bardha në një pjatë. Ul kokën, thith me hundë nga e majta në të djathtë masën e bardhë të përgatitur.
Pyetjes se çfarë po thithte kryebashkiaku i Bulqizës, qytetarët iu përgjigjën: kokainë.
Pyetjes a po merrte kokainë kryebashkiaku i Bulqizës, i emëruar nga Edi Rama, policia shkencore e Sandër Lleshajt, i emëruar nga Edi Rama, iu përgjigj: Nuk është ashtu siç duket. Kryebashkiaku që lëviz kokën nga e majta në të djathtë duke thithur me hundë një lëndë të ndarë në viza të bardha, nuk po konsumon kokainë.
Për të shpjeguar këtë arritje të re të policisë shkencore të Edi Ramës, duhet të na vijë në ndihmë Edi Rama. Ai duhet të na ndihmojë me përgjigjen e pyetjes: Përveç kokainës, çfarë merret tjeter me hundë dhe ngjan me një vizë të bardhë?!
Po SPAK si e priti këtë rezultat? Ashtu siç e kishte llogaritur: nuk është ashtu siç duket. SPAK urdhëroi analizat e urinës, që tregojnë gjurmët e kokainës maksimumi deri në 2 javë pas konsumimit të fundit, në vend që të urdhëronte testin me fije floku, që tregon gjurmët e kokainës, edhe kur ajo është konsumuar prej vitesh.
“Nuk është ashtu siç duket”- është moto me të cilën qeveris Edi Rama, edhe kur e kapin në flagrancë me kokainë, edhe kur e kapin duke vjedhur vota, edhe kur e kapin duke vjedhur me tendera e koncesione.
