Operacioni Forca e Ligjit (OFL) i ka kërkuar vetëdeklarimin e pasurisë dy personave të tjerë, banues në Tiranë, të dënuar për vepra të rënda penale.
Referuar deklaratës zyrtare të OFL-së, në zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, në kuadër të Aktit Normativ nr. 1, datë 31.01.2020, OFL u ka dërguar kërkesat për vetëdeklarim të pasurisë, shtetasve:
L. D., banues në Tiranë, i dënuar për veprat penale “Krijimi i bandës së armatosur dhe organizatës kriminale”, “Armëmbajtja pa leje”, “Organizimi dhe drejtimi i organizatave kriminale” dhe “Falsifikimi i letërnjoftimeve apo vizave” e kryer në bashkëpunim;
A. B., banues në Tiranë, i dënuar për veprat penale “Krijimi i bandës së armatosur dhe organizatës kriminale”, “Armëmbajtja pa leje” dhe “Organizimi dhe drejtimi i organizatave kriminale”;
Burime bëjnë me dije këta shtetas janë Arben Bërballa dhe Leko Durda, ose siç njihet ndryshe ky i fundit si Frederik Durda, i dënuar me 16 vite burg. Durda e Bërballa tentuan të trafikonin kokainë nga Kolumbia në 2001.
Pjesëtarët e grupit “Kokaina” u arrestuan gjate muajve shkurt-mars te vitit 2001 në Tirane, pas një operacioni te nisur nga Kolumbia dhe Italia, për dyshimet e ngritura rreth tentativës së trafikut të drogës nga Amerika Latine. Përgjimet ishin kryer nga Antidroga italiane për disa muaj dhe iu dorëzuan drejtësisë shqiptare.
Sipas Policisë së Shtetit, këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme.
