Me qindra qytetarë të Ballshit kanë dalë në protestë ditën e sotme, në shenjë mbështetjeje ndaj punëtorëve të rafinerisë së naftës të cilët janë futur në grevë urie prej disa ditësh, ku kërkojnë pagat dhe përmirësimin e kushteve të punës.
Protestës së qytetarëve të Ballshit u janë bashkuar edhe përfaqësues të Lëvizjes Vetëvendosja me qendër në Shqipëri.
Qytetarët mbanin pankarta në duar ku kërkonin ndërhyrjen e menjëhershme të shtetit dhe normalizimin e situatës, pasi naftëtarët prej 8 ditësh janë në grevë urie dhe gjendja e tyre shëndetësore sa vjen dhe rëndohet.
Ja njoftimi i VV qendra Shqipëri:
Ballshi iu bashkua punëtorëve në protestë
Me qindra qytetarë të Ballshit iu bashkuan sot protestës së punëtorëve të Uzinës së përpunimit të thellë të naftës. Marshimi protestues nisi nga Uzina dhe shkoi në qendër të qytetit. Protestës iu bashkuan edhe përfaqësues të Sindikatës së Minatorëve të Bashkuar të Buqizës dhe organizata të shoqërisë civile, përfshirë edhe përfaqësues e aktivistë të Qendrës së Lëvizjes VETËVENDOSJE! (LVV) në Shqipëri.
Punëtorët kërkojnë rrogat e papaguara prej 24 muajve, kushte më të mira në punë, remontin e uzinës dhe rinisjen e punës në rafineri. Kërkesat e tyre janë të drejta dhe të realizueshme, por ato kërkojnë organizim e mobilizim pasi krimi i mafies së naftës është i gjerë e i thellë, prej privatizimit të parë e deri te shitjet dhe rishtijet grabitqare, që janë lejuar dhe realizuar përmes kapjes së shtetit nga interesa private.
Pas protestës, përfaqësues të LVV Shqipëri vizituan edhe punëtorët që po qëndrojnë prej 8 ditëve në grevë urie në objektin pranë hyrjes kryesore të uzinës. Një prej punëtorëve grevistë ishte shtruar më herët në spital për shkak të gjendjes shëndetësore. Përfaqësuesit e LVV u shprehën punëtorëve solidaritetin dhe gatishmërinë për të ndihmuar në realizimin e kërkesave të tyre. Respektimi i të drejtave të punëtorëve është kusht për të patur një shtet të së drejtës, dhe drejtësia realizohet përmes organizimit të përbashkët në mbrotje të interesit publik.
Ballsh, 23 shkurt 2020
Lëvizja VETËVENDOSJE!
Qendra në Shqipëri
