Doktoreshë Silva Bino tha sot në një komunikim për mediat se në Shqipëri nuk ka asnjë rast të dyshuar me koronavirus.
Ajo u shpreh se ISHP është në gjendje të përcaktojë në moment analizat mbi virusin që ka shkaktuar një gjendje alarmante edhe në Itali, ku vetëm dje regjistroi dy viktima. Bino foli për masa të shtuara në pikat e kalimit kufitar dhe i drejtoi një apel qytetarëve që të jenë të kujdeshshëm me higjenën personale.
Shefja e Departamentit Infektiv tha se çdo qytetar duhet të ruajë veten dhe familjen, pikë së pari me higjenën personale.
Bino u kujdes që të qetësojë popullatën, duke vënë theksin në mospërhapjen e panikut dhe në masat që janë marrë nga institucionet shëndetësore në vend. Ajo gjithashtu i ka drejtuar një apel qytetarëve që udhëtojnë jashtë vendit që të bëjnë kujdes.
“Kujdes higjenën personale, mos pështyni përtokë, kur teshtini vendosni brrylin dhe lani duart sa më shpesh”, ishin disa nga këshillat e mjekes së njohur.
Ajo tha se koronavirusi është i ngjashëm me gripin, por ka një vdekshmëri pak më të lartë se ai.
“Kemi të gjitha pajisjet për të kryer analizat mbi koronavirusin, nuk është një pajisje por disa”, tha shefja e Departamentit Infektiv, ndërsa shtoi se edhe karantina është me një strukturë të posaçme.
Ajo gjithashtu mohoi që qendra spitalore në Kavajë të ishte përcaktuar si karantinë.
“Koronavirusi përhapet njëlloj si gripi, jo si fruthi. Një maskë kirurgjikale ju mbron”, tha ajo.
Bino apeloi që qytetarët të mos dynden në urgjenca dhe qendra shëndetësore, pasi mund të ketë një kryqëzim virusesh.
Pjesë nga deklarata e Silva Bino
“Nuk duhet të ketë panik për momentin nuk kemi asnjë rast të dyshuar në Shqipëri. E rëndësishme të jemi vigjilentë, jo vetëm por dhe të kujdesshëm për veten dhe të afërmit tanë. Ky virus nuk luftohet vetëm nga strukturat qeveritare por dhe duke u kujdesur. Mos pështyjmë përtokë, të vendosim gropëzën e bërrylit kur tështimë. Mos prekim hundën, gojën. Janë disa rregulla të thjeshta sanitare.
Ky është një virus i thjeshtë. përhapet po në atë rrugë që përhapet virusi i gripit. Gripin nuk e marrim në konsideratë shpesh herë por ky virus ka një vdekshmëri disi më të lartë se gripi. Kjo është këshilla e parë, duhet tëk ujdesemi për higjienën.
Instituti i Shëndetit Publik e përcakton diagnozën e koronavirusit në vend. nuk ka veç një pajisje por disa pajisje që ndihmojnë njëra tjetrën. Ka të gjitha kitet, të gjithë reagentët për t’u ktyer diagnoza e koronavirusit në vend. Laboratori i ISHP pjesë e rrjetit të laboratorëve europianë. Ne jemi të pajisur, të kontrolluar. Ne jemi në atë hap që janë gjithë vendet e tjera të botës, dhe sidomos të Europës.
Janë përforcuar masat në kufi. E di që të gjithë e keni mendjen atje. Ju bëj thirrje të gjithë qytetarëve që udhëtojnë, të jenë të kujdesshëm dhe të raportojnë çdo shqetësim shëndetësor. Në aeroport ndodhet njësia e inspektoratit sanitar e përbërë nga mjekë e personel shëndetësor.
Virusi në asnjë vend të botës nuk mund të ndalet në aeroport. Ka shumë diskutimet për skanerat, për temperaturat. Por nga të gjitha studimet është treguar se ato nuk kanë ndonjë vlerë në kapjen e hershme. Kapja e hershme vetëm nëpërmjet sistemit shëndetësor. Shqipëria është një vend që ka një eksperiecnë shuëm të mirë në gjurmimin e kontakteve. Javës që shkoi provuam një testim të vetes sonë për të parë sa shpejt i kapim kontaktet. Sepse është e rëndësishme kapja e kontaktit dhe më tej marrja e masave për izolimin.
Karantina është vend për të shëndoshët. Nqs kemi një kontakt me të sëmurin, ai sipas kushteve futet në vetëkarantinë, nqs kushtet e tij e lejojnë ose futet në një karantinë të përcaktuar mirë, e cila është e përcaktuar në momentin që flasim dhe është një strukturë spitalore. Kemi përzgjedhur një strukturë spitalore për kushtet e mira.
Janë përzgjedhur dhe struktura të tjera që i plotësojnë këto kushte. Kemi përcaktuar rregullat qoftë për karantinën në shtëpi, qoftë për në struktura të tjera.
Është normale që njerëzit të kenë frikë por nuk duhet të ketë panik. Kini besim tek strukturat, kini besim tek ne dhe tek mua që po flas sepse shpesh e shoh që ka dyshime”.
