Pogradeci ka mundur në trasnfertë Besën dhe i është bashkuar skuadrës së Apolonisë në krye të tabelës së klasifikimit. Golat e fitores u shënuan në pjesën e dytë. Fillimisht realizoi Alillari, për t’i lënë radhën Shytit.
Ndeshja kryesore e kësaj jave u zhvillua në “Loni Papuçiu”, ku Apolonia nuk ia doli të fitonte kundër skuadrës së Devollit. Eyoh me penallti nuk shënoi dot, ndërkohë që miqtë nga Bilishti befasuan me anë të sulmuesit Saimir Hasani. Pjesa e dytë nisi me gol, teksa Mario Gjata ndëshkoi Devollin dhe i barazoi shifrat. Apolonia deri në fund sulmoi për të realizuar golin e fitores, por pa ia dalë dot.
Elbasani ka befasuar Ilirinë e Fushë-Krujës, pasi i ka mundur këta të fundit falë një goli të shënuar nga Balla që në minutën e dytë. Verdheblutë marrin një fitore shprese për mbijetesën, pasi janë katër skuadra që kanë një diferencë të vogël.
Në ndeshjet e tjera Oriku ka arritur një fitore të rëndësishme, duke mbajtur të hapur shpresat për t’u renditur në katërshen e parë. Vlonjatët mposhtën Shënkollin në transfertë me rezultatin 0-1 ku heroi i ndeshjes u bë Kuqi, me golin e shënuar në portën e skuadrës lushnjare.
