Lionel Messi thyen heshtjen dhe në një intervistë ekskluzive për “Mundo Deportivo” përpiqet ti japë fund dyshimeve në lidhje më të ardhmen e tij: “E adhuroj këtë skuadër dhe vendin ku jetoj. Kjo është shtëpia ime. Më pëlqen rutina ime, si në aspektin profesional ashtu dhe në jetesë”.
Në intervistën e tij për të përditshmen spanjolle, sulmuesi argjentinas ka dhënë dhe versionin e tij pas akuzave të lëshuara nga “Cadena Ser”, sipas së cilës, drejtuesit e klubit kanë paguar miliona për të dëmtuar imazhin e disa futbollistëve.
“Mbeta pak i habitur. Isha në udhëtim, kur erdha mësova çfarë kishte ndodhur. Presidenti na tha të njëjtat gjëra që ka deklaruar në media. Mendoj se është e çuditshme të ketë ndodhur diçka e tillë, nuk ka logjikë. Presidenti na ka thënë se ka prova, të shohim tani se çfarë do të ndodhë. Nuk mund të them shumë gjëra, por më duket e çuditshme” – tha Lionel Messi.
Ronaldo? “Më duket krejt normale që Cristiano të vazhdojë të shënojë. Po flasim për një sulmues ‘grabitqar’, i cili ndjek golin sa herë që luan. Ka shumë cilësi si sulmues, shënon edhe në një rast fare të vogël”
“Reali pa Ronaldon ka humbur shumë gola dhe jo vetëm kaq, sepse ai i sillte edhe shumë gjëra të tjera. Nëse një ekip humbet një lojtar që shënon 50 gola në sezon, boshllëku kuptohet lehtë. Reali ka lojtarë super, por Cristiano shënonte 50 gola në sezon”.
