Pas takimit me Presidentin Ilir Meta, kreu demokrat Lulzim Basha ka thirrur një takim të kryetarëve të partive opozitare, ku pritet të diskutohet situata më e fundit politike në vend.
Në takimin me Presidentin, Basha është informuar mbi atë që Meta e cilëson si grushtin e shtetit të mazhorancës.
Takimi do të zhvillohet në selinë e PD-së dhe pritet të nisë rreth orës 13:30 të ditës së sotme.
“Presidenti Meta e njohu z.Basha me skandalet e fundit anti-kushtetuese dhe përpjekjet e Rilindjes për grusht shteti, dhe i kërkoi kryetarit të PD-së që të informonte edhe drejtuesit e partive të tjera opozitare.
Presidenti Meta bëri të qartë se do të bëjë çdo gjë për të ndaluar dhe për të shpartalluar grushtin e shtetit, duke i dhënë përgjigjen më shembullore që meriton”, thuhet në njoftimin e Presidencës.
Ndërkohë duket se Basha do të diskutojë me kryetarët e partive opozitare lidhur me shqetësimet dhe informacionet që i ka bërë të njohura Presidenti, ndërsa pritet që opozita të dalë me një qëndrim dhe të përcaktojë edhe një strategji lidhur me atë se çfarë do të ndodhë.
