Gazetarja e Ora News, Sonila Musaj, ka paditur penalisht punonjësin e Zyrës së Shtypit të kryebashkiakut të Tiranës, Erion Veliaj, Aurel Boriçi.
Ky i fundit pengoi gazetaren Muskaj të kryente detyrën e saj, ndërsa po tentonte t’i bënte një pyetje Kryebashkiakut të Tiranës.
Incidenti ndodhi më 11 shkurt, në sheshin ‘Nënë Tereza’.
Nga video e publikuar duket Boriçi që e pengon gazetaren, fillimisht me trup dhe më pas duke e përqafuar, në mënyrë që ajo të mos i afrohet kryebashkiakut.
“Erdhi dhe më përqafoi për të më penguar ushtrimin e detyrës time. Kjo sjellje është e papranueshme, seksiste. Unë jam nëna e dikujt dhe bashkëshortja dhe vajza e dikujt. Nuk e di si do të ishte ndjerë zoti Boriçi nëse një skenë e tillë do i kishte ndodhur bashkëshortes së tij”, thotë gazetarja.
Në vijim ajo shprehet se qëllimi ishte për të penguar punën e saj si gazetarë që të mos e intervistoja kryetarin e bashkisë për problematikat që kanë qytetarët e Tiranës.
“Jam krejtësisht e pafjalë. U pengua puna e një gazetari. Kur kjo i bëhet një gazetari imagjino çfarë mund ti bëhet një qytetari”, u shpreh gazetarja Musaj.
Në video dëgjohet Boriçi i cili i thotë gazetares “Hajde të të përqafoj” . E indinjuar gazetarja i kërkon të mos i afrohet. “Të lutem mos më prek, si mund të përqafosh një femër që nuk e njeh!”.
