Policia e Shkodrës arrestoi dy persona pas një konflikti mes tyre, ndërkohë që njëri prej të arrestuarve mbeti i plagosur me thikë.
Policia sqaron se kishte marrë njoftim se në spitalin rajonal ishte paraqitur një shtetas i plagosur.
Por, gjatë marrjes në pyetje nga oficerët e policisë, shtetasi i shtruar në spital ka mohuar se është plagosur nga ndonjë person tjetër, ndërsa ka dhënë versionin e dëmtimit aksidental duke rregulluar mjetin.
“Specialistët për Hetimin e Krimit në Komisariatin e Policisë Shkodër, bazuar në thëniet kontradiktore të këtij shtetasi, thelluan hetimet dhe falë veprimeve të shpejta u bë e mundur zbardhja e ngjarjes dhe ka rezultuar se:
Shtetasi W. (J.) M., 36 vjeç, banues në Shkodër, gjatë një konflikti për motive të dobëta ka plagosur me thikë e sende të forta shtetasin E. C., 34 vjeç, banues në Shkodër.
Në përfundim të veprimeve u bë arrestimi në flagrancë i shtetasit W. (J.) M., 36 vjeç, banues në lagjen “10 Korriku”, Shkodër, për veprën penale “Plagosja e rëndë me dashje”.
Gjithashtu, u bë arrestimi në flagrancë edhe i shtetasit E. C., 34 vjeç, banues në lagjen “Guerile”, Shkodër, për veprën penale “Moskallëzimi i krimit”, thuhet në njoftimin e policisë.
